Жаҳон соғлиқни сақлаш ташкилоти вакцинация тўғрисида ёлғон хабарларнинг тарқалиши инсоният саломатлигига хавф солаётган асосий омиллардан бири эканлигини маълум қилди. Бу ҳақда Евроньюс нашри хабар берди.
Бельгия пойтахти Брюсселда вакцинация муаммоларига бағишланган халқаро саммит ўз ишини бошлади. Унда турли давлатлардан 400 га яқин вакиллар иштирок этишмоқда. Эмлаш аҳоли саломатлигини ҳимоя қилишнинг энг муваффақиятли чорасидир. Эмлашнинг кенг тарқалиши кўплаб касалликларни йўқ қилишга имкон берди. Айнан кенг кўламли вакцинация йўли билан Европа полиомиелитдан халос бўлди. Ҳисоб-китобларга кўра, ҳар йили эмлаш дунё бўйлаб 2,5 миллион кишини ўлимдан қутқаради ва кассалликларни даволаш билан боғлиқ бўлган харажатларни камайтиради.
Бироқ сўнгги йилларда ижтимоий тармоқлар ва турли ахборот ресурсларида эмлашнинг хавфли эканлиги тўғрисидаги ёлғон маълумотларнинг тарқалиши натижасида аҳолининг вакцинацияга бўлган ишончи пасаймоқда. Бунинг натижаси ўлароқ эса қизамиқ касаллигининг оммавий тарқалишини кўриш мумкин. Айнан эмлашга қарши кайфиятнинг кучайиши натижасида 2018 йили Европада қизамиққа чалинганлар сони сўнгги ўн йилдаги энг рекорд натижага бориб етди. Халқаро саммитнинг асосий мақсади вакцинация ёрдамида олдини олиш мумкин бўлган касалликларга қарши глобал курашишга янги импульс беришдан иборатдир.
