"Ertaga nima bo`ladi, bilmayman. Bular tinch qo`yisharmikin..." Surxondaryolik maktab direktori yana qamab qo`yilgani aytilgach, vazir o`zi aloqaga chiqdi (video)

Kuni kecha ijtimoiy tarmoqlarda tarqalgan Surxondaryo viloyati hokimi ishtirokida o`tkazilgan yig`ilishda Sariosiyodagi 29-maktab direktori Umida Tursunova bilan bog`liq holat keskin muhokamalarga sabab bo`ldi.

Unda direktor ayol nohaq ishdan bo`shatilganini aytib, qator nohaqliklarni gapirib tashlar ekan, “Miltiq bo`lsa otib tashlang” deya jonidan o`tib ketganini bildirgan. Videoda ayolni IIB xodimlari olib chiqib ketgani aks etgan. Shundan so`ng, direktorning qamab qo`yilgani haqida xabarlar tarqaldi. 

Shundan so`ng, Maktabgacha va maktab ta`limi vaziri Hilola Umarova munosabat bildirb, ayol qamoqdan ozod qilinganini, xavotirga o`rin yo`qligini ma`lum qildi.

Biroq bir muddat o`tib, ayolning yana o`z uyidan olib ketilgani haqida xabarlar tarqaldi. Vaziyatga aniqlik kiritish maqsadida vazir Hilola Umarova kecha tunda direktor ayolning o`zi bilan bog`landi.

Suhbat jarayonida ayol ayni paytda uydaligi, 7 kun qamalgani, endi bundan keyingi hayoti qanday bo`lishidan xavotirda ekanini bildirgan. Vazir holat shaxsan nazoratga olinganini, keyingi hayotida hech qanday muammo bo`lmasligini aytib, pedagoglar davlat rahbari himoyasida ekanini aytgan.