12 апрель куни Инновацион ривожланиш вазирлиги ҳузуридаги Илмий-техник ахборот маркази томонидан Ўзбекистонлик тадқиқотчи олимлар учун билим ва кўникмаларини оширишга қаратилган бепул “English for Science” академик инглиз тили дастурининг иккинчи мавсуми очилиши муносабати билан пресс-конференция ўтказилди.
Пресс-конференцияда Илмий-техник ахборот маркази директори ўринбосари Фаррух Аминов, иқтисодчи-олим, энг кўп иқтибос келтириладиган илмий мақолалар муаллифларидан бири Рауф Салаходжаев, Илмий-техник ахборот маркази Илмий нашрлар ва журналларни қўллаб-қувватлаш бўлими етакчи мутахассиси Нуруллахон Назруллаев иштирок этдилар.
– Курсларда олинган билимларни амалда қўллаш тингловчиларнинг ўзига ҳам боғлиқ, – деди Рауф Салоходжаев. – Мен инглиз тилида мақола ёзмоқчи бўлган тадқиқотчиларга нуфузли халқаро илмий журналлардаги ўз соҳаларига доир мақолаларни кўпроқ ўқишни, уларни кузатишни ва тегишли хулосалар чиқаришни маслаҳат бераман.
Ушбу лойиҳа вазирлик ҳузуридаги Илмий-техник ахборот маркази, FANUR Education ўқув маркази ҳамда Британия Кенгаши ҳамкорлигида амалга оширилмоқда. Мазкур дастурнинг 1-мавсуми 2020 йилдан 13 октябрда бошланиб, 24 нафар тингловчи тест ва суҳбат кўринишида саралаб олинганди. 3 ойлик курсларда иштирок этган тингловчилар ҳозирда халқаро конференцияларда фаол қатнашмоқдалар, Scopus маълумотлар базасида мақолаларини чоп этишга муваффақ бўлмоқдалар.
– Ўқув курсларини ўтиш методлари асосида махсус ўқитиш дастури ишлаб чиқилди, – деди Н. Нарзуллаев. – Дастурнинг ўзига хослиги – у «қолип»га туширилган эски ўқитиш усулларидан бутунлай фарқ қилади. Биз дастурни айнан Европа ва АҚШ стандартига хос бўлган АРА- American Psychological Association ва CMC-Chicago Manual Style асосида тузишга ҳаракат қилдик. АРА услуби , Америка психологик ассоциацияси томонидан ишлаб чиқилган бўлиб, ижтимоий фанлар академик иш юритишнинг кенг тарқалган шакли ҳисобланади. Ушбу услуб мақолани шакллантириш бўйича кўрсатмалар, шунингдек, иқтибослар, изоҳлар, жадваллар, мақола шрифтини ва тузилишини лойиҳалаш бўйича кўрсатмаларни ўз ичига олади. Ҳамда дастур илмий мақолани ёзиш, унинг структураси, қандай терминология (терминлар асосида) бўлиш ҳақидаги йўналишларни қамраб олади.
Мен фаолият юритган London College of IT and Commercial коллежида айнан мана шу АРА ва СМС дастури кенг қўлланилади. Шу сабабли қуйидаги АРА ва CMC дастурларни мукаммал ўзлаштиришимга имкон бўлган.
Лойиҳанинг 2-мавсуми учун Тошкент шаҳар олий таълим муассасалари ва илмий тадқиқот институтларидан 200 нафар иштирокчи 3 босқичдан иборат танлов асосида саралаб олинди. Танлов учун 1167 та мурожаат келиб тушди. Танлов жараёни 3 босқичдан иборат бўлиб, 636 нафар номзод онлайн сўровнома натижасида тавсия этилди. Иккинчи босқич телефон орқали инглиз тилида суҳбат бўлиб, ушбу босқичдан 240 нафар номзод кейинги босқичга ўтди. Сўнгги 3-босқичда иштирокчилар илмий тадқиқотлар бўйича тақдимотларини ҳимоя қилишди. Мазкур танловдан сўнг 200 нафар иштирокчи “English for Science” курсларига муваффақиятли қабул қилинди. Иштирокчилар 9 ой давомида академик инглиз тили йўналишида ўқитилади.
Ушбу лойиҳадан кўзланган асосий мақсад ўзбек олимларининг Springer, Wiley ва бошқа халқаро маълумотлар базаларидан унумли фойдаланишларини таъминлаш, нуфузи халқаро илмий журналларда мақолалар чоп этиш салмоғини кенгайтиришдир. Мазкур курсларда олимларга ўз илмий мақолаларини тайёрлаш ва халқаро илмий журналларда нашр этиш учун академик инглиз тили ўргатилади. Шунингдек, лойиҳа давомида олимларнинг ўз тадқиқотлари учун хорижий молиялаштириш манбалари – грантларни қўлга киритиш ва натижаларни тижоратлаштириш бўйича кўникмалари ривожлантирилади.
Пресс-конференцияда Инновацион ривожланиш вазирлиги матбуот котиби Назокат Абдуқундузова мазкур дарслар вазирликнинг Youtube каналига жойлаб борилишини маълум қилди.
