Avvalroq, 15 noyabr kuni Namangan viloyati Norin tumani Norinkapa mahallasi hududida joylashgan “Qambarali ota nabirasi Baxtiyor” fermer xo`jaligining dala shiyponi o`tin xonasidan 8 yoshli maktab o`quvchisi I.U.ning murdasi qotillik alomatlari bilan topilgani xabar qilingan edi.
Ayni paytda ma`lum bo`lishicha, bolakay oilada yolg`iz farzand bo`lgan. Bu haqda "Zamon" dasturida ma`lum qilindi.
Keltirilgan tafsilotlarga ko`ra, bolakay 15 noyabr kuni soat tongi 8:30larda uy parrandalarini boqish uchun ko`chaga chiqqan va bedarak yo`qolgan. Shu kuni kechgacha bola ota-onasi va yaqinlari tomonidan qidiriladi. Mahalla faollaridan biri Norinkapa mahallasi hududida joylashgan “Qambarali ota nabirasi Baxtiyor” fermer xo`jaligining dala shiyponi o`tin xonasidan bola jasadi chiqqani haqida IIBga xabar beradi. Shundan so`ng, jasad qidirilayotgan 8 yoshli maktab o`quvchisi I.U.ga tegishli ekani ma`lum bo`lgan. Mazkur jinoyat yuzasidan bo`lib o`tgan yig`ilishda ma`lum qilinishicha, bola ota-onasiga yolg`iz o`g`il farzandi ekan.
Ayni paytga qadar qotillik tafsilotlari to`liq ochiqlanmadi. Bosh prokuratura o`sha kunning o`zida viloyat prokuraturasi tomonidan noma`lum shaxsga nisbatan JKning 97-moddasi 2-qismi “v, z” bandlari bilan jinoyat ishi qo`zg`atilib, hozirda fosh etish choralari ko`rilayotganini ma`lum qilgan edi.
