Avval xabarberganimizdek, O`zbekiston Respublikasi Oliy sudi, AQSh Xalqaro taraqqiyot agentligi (USAID) va BMT Taraqqiyot dasturining “O`zbekistonda qonun ustuvorligi yo`lida hamkorlik” qo`shma loyihasi doirasida mahalliy va xorijiy OAVlari ishtirokida press—tur o`tkazildi...
Press—tur safaridagi galdagi manzil 3 mln. 850 ming aholi yashaydigan Samarqand viloyati bo`ldi. Ilk tashrifimiz doirasida Toyloq tuman sudlari faoliyati bilan tanishishdan boshlandi. Press—tur ishtirokchilarini O`zbekiston Respublikasi Oliy sudi raisining o`rinbosari Xolmo`min Yodgorov va Toyloq tuman sudi raislari, o`rinbosarlari va sudyalar qarshi olishdi.
Dastavval 2019 yil 11 oyi davomida odil sudlov faoliyati yuzasidan fuqarolik ishlari bo`yicha Samarqand viloyat, tumanlararo, tuman (shahar) sudlari tomonidan amalga oshirilgan ishlar bilan qiziqdik.
Samarqand viloyat sudlari tomonidan birinchi instansiyasida 19 794 ta fuqarolik ishlari ko`rib tamomlangan bo`lib, shundan 14 905 ta da`vo qanoatlantirilgan. 2 719 ta da`vo rad qilingan, 1 268 ta ariza ko`rmasdan qoldirilgan va 902 ta fuqarolik ish ish yuritishdan tugatilgan.
Tumanlararo sudlari tomonidan buyruq tartibida jami 7 400 ta sud buyruqlari chiqarilgan. Shundan yozma bitimga asoslangan va javobgar tomonidan tan olingan talablar yuzasidan 368 ta, voyaga etmagan bolalar uchun aliment undirish haqidagi talablar yuzasidan 5010 ta, ish haqi va unga tenglashtirilgan to`lovlarni undirish haqidagi talablar yuzasidan 639 ta va fuqarolardan soliq va boshqa majburiy to`lovlar bo`yicha qarzlarni undirish to`g`risidagi talablar yuzasidan 1382 ta sud buyruqlari chiqarilgan.
Viloyat sudlari tomonidan nizolarni keng jamoatchilik ishtirokida 9 270 ta ishlar sayyor sud majlislari tartibida ko`rilgan. Ishlar yuzasidan sud ta`sir chorasi tariqasida tamomlangan ishlar bo`yicha 591 ta xususiy ajrim chiqarilgan.
Shuningdek, 4 911 ta nikohdan ajratish haqida ishlar ko`rilgan. Shundan 2 717 tasi qanoatlantirilgan, 1 707 tasi rad etilgan, 314 tasi ko`rmay qoldirilgan va 253 tasi tugatilgan. Mazkur 253 ta ishdan 191 ta ishlar taraflarning yarashtirilganligi sababli ish yuritishdan tugatilgan.
Viloyat sudi apellyasiya va kassasiya instansiyasida jami 1 234 ta ish ko`rilgan. Shundan 543 tasi apellyasiya va 691 tasi kassasiya tartibidagi ishlar.
Samarqand viloyat ma`muriy sudlari tomonidan esa 2019 yil 11 oyi davomida Samarqand viloyat va tuman (shahar) ma`muriy sudlarida jami bo`lib, 41 319 ta shaxsga nisbatan 32 942 ta ma`muriy ish hamda 1 193 ta ommaviy huquqiy munosabatlarga oid ishlar ko`rilgan.
Mazkur ishlar bo`yicha jami 1 193 ta ariza qanoatlantirilib, davlat boshqaruvi organlarining, ma`muriy—huquqiy faoliyatini amalga oshirishga vakolatli bo`lgan boshqa organlar qarorlarini huquqiy emas deb topish yoki mansabdor shaxslar xatti—harakatlarini qonunga xilof deb topish orqali fuqarolarning qonuniy huquq va manfaatlari tiklangan.
Sudlar tomonidan ish yurituvidagi ishlar bo`yicha joylarda 2018 yil davomida 23 074 ta va 2019 yil 11 oy davomida 17 001 ta sayyor sud majlislari o`tkazilgan.
Samarqand viloyat ma`muriy sudiga kelib tushgan murojaatlar o`tgan yildagiga nisabatan ko`payganmi yo kamaygan? Mazkur savolga ham javob topdik:
2018 yilda jami 1 465 ta murojaat kelib tushgan bo`lib, shundan 369 tasi bo`yicha tushuntirish berilgan va 24 tasi rad qilingan.
2019 yil 11 oyi davomida 1 727 ta murojaat kelib tushgan. Shundan 147 tasi qanoatlantirilgan, 1 576 tasi bo`yicha tushuntirish berilgan va 4 tasi rad qilingan.
Sud binolarida o`rnatilgan maxsus elektron tizim orqali respublika bo`yicha 4 ta sudning ko`radigan jami ishlari jadvali va sud qarorlarini bilan tanishish mumkin.
Bordiyu sudga kelgan fuqarolar mazkur elektron tizimdan foydalanishni bilmasa, xodimlar yordam beradi.
Sudga tashrif buyuruvchilar uchun sud binosidagi fuqarolar qabulxonasi qulay tarzda jihozlangan ekan.
Sudga kelgan fuqarolarga jinoyat ishlari, fuqarolik ishlari, ma`muriy va iqtisodiy ishlar bo`yicha xodimlar tushuntirishlar berayotgani va hujjatlarini qabul qilayotgan jarayonga guvox bo`ldik.
Fuqarolarga engillik yaratish uchun maxsus sudyalar qabulxonasi ham tashkil qilingan.
Samarqand viloyatining Toyloq tuman sudida muqaddam sodir etgan jinoyati uchun tayinlangan axloq tuzatish va ozodlikdan cheklash jazolarini o`tayotgan 5 nafar shaxsga nisbatan Jinoyat ishlari bo`yicha Toyloq tuman sudining raisi Marat Ergashev raisligidagi sud jarayonida ishtirok etdik.
— Mazkur 5 nafar shaxs nima asosida jazodan butkul ozod qilindi?
Marat ERGAShEV, Jinoyat ishlari bo`yicha Toyloq tuman sudining raisi:
— Sud 5 nafar maxkum: R.Saidov (JKning 266—moddasi 2—qismi “Transport vositalari harakati yoki ulardan foydalanish xavfsizligi qoidalarini buzish” bilan sudlangan), B.Saidova (JKning 273—moddasi 5—qismi “Giyohvandlik vositalari yoki psixotrop moddalarni o`tkazish maqsadini ko`zlab qonunga xilof ravishda tayyorlash, egallash, saqlash va boshqa harakatlar qilish, shuningdek ularni qonunga xilof ravishda o`tkazish” bilan sudlangan, O`.Xudoyorov (JKning 165—moddasi 2—qismi “Tovlamachilik” bilan sudlangan), B.Kambarov (JKning 104—moddasi 1—qismi “Qasddan badanga og`ir shikast etkazish” bilan sudlangan, F.Oblokulov (JKning 182—moddasi 2—qismi “Bojxona to`g`risidagi qonunlarni buzish” bilan sudlangan)ning ishini ko`rib chiqdi.
O`z jinoiy harakatlarining salbiy oqibatini tushunib etgani va pushaymonligini hisobga olgan holda ular JKning 73—moddasi talabida jazoning qolgan qismini o`tashdan shartli ravishda ozod qilindi.
