41 nafar odamni jarohatlagan Andijondagi avtohalokat qurbonlari soni ortdi

Andijonda yuz bergan avtohalokat oqibatida jabrlanganlardan yana biri vafot etdi. Bu haqda SSV matbuot xizmati xabar qildi. 

26 noyabr kuni A-373 Toshkent-O`sh-Andijon avtomagistralining 389-390-kilometrlari oralig`ida "Isuzu" avtobusi va  yuk mashinasi to`qnashib, oqibatda 3 nafar fuqaro voqea joyida vafot etgan, 38 nafar yo`lovchi turli jarohatlar bilan shifoxonaga yotqizilgan edi. 

Ayni paytda Sog`liqni saqlash vazirligi nazoratida bo`lgan ushbu bemorlardan 4 nafariga tibbiy xulosalar ijobiy bo`lgani uchun ambulator sharoitda davolanish uchun uyiga ruxsat berildi.

Qayd etilishicha, o`ta og`ir ahvoldagi yana bir nafar bemor amalga oshirilgan reanimasion choralarga qaramasdan vafot etdi.

Ushbu fuqaro shifoxonaga "Bosh miyaning og`ir darajada lat eyishi. Miya o`zagi shikastlanishi. Qorin bo`shlig`i a`zolari yopiq jarohati. Jigar segmentlarining ezilib yorilishi. Chap bilak suyagining ochiq sinib siljishi. O`ng boldir sohasi old yuzasi va o`ng qo`l tirsak sohalarining 2-darajali kuyishi. 3-darajali travmatik shok" tashxisi bilan olib kelingan edi. Unda belgilangan standartlar bo`yicha barcha zarur amaliyotlar o`tkazilgan.

 Hozirda 33 nafar bemorda shifokorlar zarur muolajalarni davom ettirmoqda.

Nazoratda turgan bemorlarning 11 nafari RShTYoIM Andijon filialida, 16 nafari Asaka tumani, 4 nafari Bo`ston tumani, 2 nafari Shahrixon tumani shoshilinch tibbiy yordam bo`limlarida davolanmoqda.

Ushbu bemorlarning 1 nafari o`ta og`ir, 5 nafari og`ir ahvolda. Sog`liqni saqlash vazirligi ularning holatini to`liq nazoratga olgan bo`lib, bemorlar zarur tibbiy yordam va dori-darmonlar bilan to`liq ta`minlangan.