Farg`onada bog`cha mudirasi va oshpazi pora bilan ushlandi

Farg`ona viloyati Qo`qon shahrida ixtisoslashtirilgan maktabgacha ta`lim tashkiloti rahbari va oshpazi 200 dollar pora bilan qo`lga tushdi. Bu haqda O`zA xabar berdi.

Xabarga ko`ra, bog`cha mudirasi mazkur lavozimda 3 yildan buyon ishlab kelayotgan bo`lgan. Ilgari bu erda ishlab, tug`uruq ta`tilida bo`lgan N.M. ishga qaytish bo`yicha unga bir necha bor murojaat qilgan. Ishga olish uchun oshpaz vazifasida ishlagan ayol undan 200 AQSh dollarini so`ragan.

Huquqni muhofaza qiluvchi organlar tomonidan o`tkazilgan tezkor tadbir davomida oshpaz ayol o`zining yashash uyi O`zbekiston tumani «Navbahor» mahalla fuqarolar yig`inida N.A.dan 200 AQSh dollarini mudira R.I.ga berish uchun olgan vaqtda ushlangan. Tezkor tadbir davom ettirilib, bog`cha mudirasi oshpaz ayoldan 200 AQSh dollarini olgan vaqtda daliliy ashyo bilan qo`lga tushgan.

Ma`lum qilinishicha, jinoyat ishlari bo`yicha Qo`qon shahar sudi tomonidan mazkur ish ko`rib chiqilgan. Bog`cha mudirasi R.I.ga Jinoyat kodeksining 210-moddasi 1-qismi bilan 2 yil muddatga mansabdorlik va moddiy javobgarlik lavozimlarida ishlash huquqidan mahrum qilgan holda 3 yil ozodlikdan cheklash jazosi tayinlangan. Shuningdek, oshpaz ayolga ham qonuniy jazo belgilangan.