Bugun, 23 iyun kuni Prezident Shavkat Mirziyoev elektr energetikasi korxonalari faoliyatini transformasiya qilish masalalari bo`yicha yig`ilish o`tkazdi. Unda energetika bozorini boshqarish bo`yicha yangi tizim yaratish masalalari muhokama etildi.
Qayd etilishicha, xususiy generasiya korxonalari ulanishi uchun teng sharoit yaratish maqsadida “O`zbekiston milliy elektr tarmoqlari” aksiyadorlik jamiyatining elektr energiyasini yagona xarid qilish va magistral tarmoqlarni boshqarish vakolatlarini ajratish taklifi bildirildi. Bunda, yagona xarid qiluvchi kompaniya barcha elektr stansiyalaridan elektr energiyasini shartnoma asosida sotib olib, yirik korxona va hududiy elektr tarmoqlari korxonalariga sotadi. Magistral tarmoq operatori esa elektr energiyasini etkazib berish, yo`qotishlarni kamaytirish va energotizimni texnik boshqarish bilan shug`ullanadi.
Ta`kidlanishicha, kelgusi yilda 14 ta tuman va shaharda “Hududiy elektr tarmoqlari” AJga muqobil tarzda, iste`molchilarga elektr energiyasini sotadigan xususiy chakana elektr savdo kompaniyalari tashkil etiladi.
Shuningdek, tarmoq rahbarlariga transformasiya jarayonini jadallashtirish, korxonalarni moliyaviy sog`lomlashtirish va to`g`ridan-to`g`ri investisiyalar jalb qila oladigan kompaniyalarga aylantirish kerakligi ta`kidlandi. Soha korxonalarining operasion xarajatlarini optimallashtirish, elektr uzatish tarmoqlarini yangilash bo`yicha ham topshiriqlar berilgani aytiladi.
Davlat rahbari matbuot xizmati xabariga ko`ra, hukumat va soha rahbarlariga ushbu islohotlarni amalga oshirish uchun zarur bo`lgan yuqori malakali kadrlarni tayyorlash bo`yicha dastur ishlab chiqish vazifasi qo`yildi.
