Joriy yilning 27 avgust kuni O`zbekiston Respublikasi Mustaqilligining 31 yillik bayrami munosabati bilan “O`zbekneftgaz” AJ Boshqaruv raisining birinchi kubogi hamda “Save Aral – 2022” ommaviy yugurish musobaqalarining kuzgi bosqichi boshlandi.
Ushbu ommaviy yugurish musobaqasi “O`zbekneftgaz” AJ, “Uzbekistan GTL” zavodi hamda Engil atletika federasiyasi hamkorligida tashkil etildi.
Tadbir doirasida 8 ta ommaviy yugurish musobaqasini o`tkazish rejalashtirilgan. Unda sportni rivojlantirishga va atrof-muhit muhofazasiga o`z hissasini qo`shmoqchi bo`lganlar qatnashishlari mumkin.
Boshqaruv qaroriga ko`ra, ilk marotaba yugurish musobaqasi O`zbekiston shaharlarining markaziy ko`chalari bo`ylab odatdagi marshrut bo`yicha emas, Markaziy Osiyodagi sintetik yoqilg`i ishlab chiqarish bo`yicha yagona bo`lgan korxona – “Uzbekistan GTL” zavodi yonidan start oldi.
Ijtimoiy-ekologik hamkorlik sohasidagi masalalarni amalga oshirish maqsadida sport va yuqori texnologiyalar kollaborasiyasi Engil atletika federasiyasining yangi rahbariyati tomonidan taklif etildi. Eslatib o`tamiz, joriy yilning fevral oyidan boshlab “O`zbekneftgaz” AJ Boshqaruv raisi Mehriddin Abdullaev Federasiyaga rahbarlik qilmoqda.
“Save Aral – 2022” xayriya ommaviy yugurish musobaqasi va “O`zbekneftgaz” AJ Boshqaruv raisi kubogining “GTL” zavodi atrofida o`tkazilishi neft va gaz sanoati jamoasini ommaviy sport bilan faol shug`ullanishga jalb qilish uchun ajoyib tashabbus bo`ldi, desak mubolag`a bo`lmaydi.
– Ishchi-xodimlar salomatligiga g`amxo`rlik qilish va mehnat muhofazasini ta`minlash asosiy vazifalarimizdan hisoblanadi. “GTL” zavodida xalqaro standartlar talablariga javob beradigan eng zamonaviy qurilmalarni joriy etish bilan bir paytda jamoa ichida ekologik mas`uliyatni shakllantirish ham dolzarbdir, – dedi hayriya tadbirining ochilish marosimida Mehriddin Abdullaev.
Neft va gaz korxonalari faoliyatida atrof-muhitni himoya qilish masalalari doimiy e`tiborda. Shu bois aksiyadorlik jamiyati “GTL” majmuasi yonidagi G`uzor tumanini obodonlashtirishga qaratilgan ekologik aksiyalarga katta istak bilan qo`shildilar. Ekologik aksiyalar doirasida Federasiya va “O`zbekneftgaz” AJ tomonidan saksovul ekish hamda hududni maishiy chiqindilardan tozalash ishlari amalga oshirildi.
“Save Aral – 2022” sport ommaviy yugurish musobaqalarini o`tkazishdan maqsad jamoatchilik e`tiborini Orol dengizi fojeasi va Orolbo`yi mintaqasini qayta tiklash masalalarini hal qilish uchun choralarni faollashtirishga jalb qilishdan iborat.
Bugungi kunda aholining ekologik bilimi va madaniyatini oshirishga qaratilgan ushbu ijtimoiy loyiha keng ko`lamli tashabbusga aylanib ulgurgan. Hayriya tadbiriga keng jamoatchilikning qiziqishni ta`minlash maqsadida Engil atletika federasiyasi tomonidan doimiy ravishda ommaviy yugurish musobaqalarini noodatiy o`tkazish formatlari taklif etiladi.
“Save Aral – 2022” hamda “O`zbekneftgaz” AJ Boshqaruv raisining birinchi kubogi sport tadbirining neft va gaz majmuasi atrofida, tungi paytda tashkil etilishi ham ishtirokchilarning jalb etishni o`zgacha echimi bo`ldi.
“Uzbekistan GTL” majmuasi yonidagi xavfsiz marshrut bo`ylab start olgan ommaviy yugurish musobaqasining finish nuqtasi zavodning “Ishchilar shaharchasi” bo`ldi.
Ommaviy yugurish musobaqasida 1800 nafar ishtirokchilar qatnashdi. Shulardan 600 nafari “GTL” zavodi, Sho`rtan neft va gaz qazib chiqarish boshqarmasi va Sho`rtan gaz kimyo majmuasida faoliyat yuritadigan ishchi-xodimlar oila a`zolaridir. 130 nafari esa harbiylardir. Ushbu sport tadbiriga sportchilar hamda yugurish havaskorlari ham qo`shilishdi. Har bir ishtirokchi qurib borayotgan Orol dengizi tasvirlangan sport kiyimi hamda fonar o`rnatilgan bosh kiyimlari bilan ta`minlandi.
Musobaqa g`oliblari quyidagi natijalarga erishidilar:
Xodim erkaklar:
1. Primov Hasan 12:30.43
2. Purmanov Mansur 12:31.55
3. Primov Husan 12:32.46
Mahalliy erkaklar:
1. Mahmudov Jahongir 12:05.87
2. Juraev Muslimbek 12:15.43
3. Muhammadiev Asilbek 12:16.40
Xodim ayollar:
1. Iemke Stlyn 16:08.18 Janubiy Afrika
2. Kenjaeva Shirin 16:26.28
3. Tojieva Farida 17:02.26
Mahalliy ayollar:
1. Omonova Dilfo`z 14:42.56
2. Saidmuradova Shohida 15:10.57
3. Hukumova Jonbibi 15:40.22
Eng yaxshi natijani ko`satganlar hamda alohida nominasiyalar bo`yicha g`oliblikni qo`lga kiritganlar esdalik sovg`alari bilan taqdirlandi.
Ushbu sport loyihasi O`zbekistonda ommaviy sportni rivojlantirishga qaratilgan eng kuchli va samarali vositalardan biriga aylandi.
Joriy yil boshidan “O`zbekneftgaz” AJ hamda Engil atletika federasiyasi tomonidan Sirdaryo, Jizzax, Navoiy, Qashqadryo, Surxondaryo, Toshkent viloyatlari va poytaxtda 12 ta ommaviy yugurish musobaqasi tashkil etildi.
