O`zbekiston Respublikasi Prezidenti Shavkat Mirziyoev Boku shahriga kelgach, Ozarbayjon xalqining umummilliy etakchisi Haydar Aliev mangu qo`nim topgan Faxr xiyoboniga tashrif buyurdi.
Haydar Alievning mustaqil Ozarbayjonni barpo etish va mustahkamlash yo`lidagi xizmatlari beqiyos. Mamlakatning jadal rivojlanish davri va xalqaro maydondagi nufuzining yuksalishi aynan uning ismi bilan bog`liq.
Qardosh o`zbek xalqi bilan do`stona munosabatlarni mustahkamlashga doimo alohida e`tibor qaratgan Haydar Alievni yurtimizda yaxshi bilishadi. O`zbekistonda uning yuz yillik yubileyi keng nishonlandi. Shu munosabat bilan pochta markalari bosilgan, turli madaniy-ma`rifiy va ilmiy tadbirlar o`tkazilgan edi.
Toshkentda Ozarbayjon xalqining umummilliy etakchisi nomidagi ko`cha, unga bag`ishlangan xiyobon va yodgorlik ochilgan.
Shavkat Mirziyoev buyuk davlat va siyosat arbobi Haydar Aliev qabriga gul qo`yib, xotirasiga hurmat bajo keltirdi.
