Yaqinda Bojxona qo`mitasi va Davlat xavfsizlik xizmati tomonidan “Toshkent-Aero” ixtisoslashtirilgan bojxona komleksining “Aviayuklar” tashqi iqtisodiy faoliyat bojxona postida havo yo`llari orqali respublikamizga xorijdan olib kelinib, so`ngra yuk avtotransport vositasi orqali tranzit tarzida olib o`tilishi rejalashtirilgan 25 tonna og`irlikdagi 1000 qop qandolat ko`knorisi urug`lari oziq-ovqat mahsuloti belgilangan tartibda bojxona ko`rigidan o`tkazildi. Bu haqda Bojxona qo`mitasi Matbuot xizmati xabar bermoqda.
Odatda turli pishiriqlarga qo`shiladigan yoki yuzasiga sepiladigan qandolat ko`knorisi garchi o`xshash bo`lsa-da, an`anaviy ko`knori giyohvandlik vositasidan tubdan farq qiladi. Ya`ni, ushbu mahsulot ko`knori oilasiga mansub o`t o`simliklarning maxsus tayyorlangan va qayta ishlangan urug`lari hisoblanadi.
Ammo, bojxona ko`rigi davomida hujjatlarda qandolat ko`knorisi deb ko`rsatilgan 25 tonna urug` va somonlar tarkibida qarangki, haqiqiy giyohvandlik vositasi hisoblangan 8,5 tonna ko`knori somoni borligi aniqlandi.
O`zbekiston Respublikasi Vazirlar Mahkamasining “Giyohvandlik vositalari, psixotrop moddalar va prekursorlarni O`zbekiston Respublikasi hududiga olib kirish, undan olib chiqish va tranzit tarzida o`tkazish tartibini, shuningdek ularning muomalada bo`lishi yuzasidan nazoratni takomillashtirish to`g`risida” 2015 yil 12 noyabrdagi 330-son qaroriga binoan ko`knor somoni mamlakatimiz hududida muomalasi taqiqlangan giyohvandlik moddasi hisoblanadi.
Hozirda ushbu holat yuzasidan bojxona organlari tomonidan jinoyat ishi qo`zg`atildi.
Ta`kidlash joizki, bitta holatda 8,5 tonna giyohvandlik vositasining fosh qilinishidek eng yirik ko`rsatkich O`zbekiston bojxona xizmati organlarining so`nggi 30 yillik tarixida ilk bor qayd etilmoqda.
