O`zbekistonga rasmiy tashrif bilan kelgan Fransiya Respublikasi Prezidenti Emmanuel Makron Prezident Shavkat Mirziyoev hamrohligida tungi Samarqand bo`ylab sayr qildi. Bu haqda prezident matbuot xizmati xabar qilmoqda.
Davlat rahbarlari YuNESKOning Jahon merosi ro`yxatiga kiritilgan Registon majmuasiga tashrif buyurdilar.
Oliy martabali mehmonga ushbu Sharq me`morchiligi durdonasining qurilish tarixi, noyob naqshlari, ushbu maskan bilan bog`liq mashhur voqea va shaxslar xususida so`zlab berildi.
Fransiya Prezidentining tashrifi Samarqandda o`tayotgani va aynan Registondan boshlangani bejiz emas. Bu erda xalqlarimiz o`rtasidagi tarixiy mushtaraklikni mujassam etgan jihatlar ko`p.
Xususan, Sohibqiron Amir Temur buyuk sarkarda, savdo va ilm-fan homiysi sifatida Osiyo va Evropada ro`y bergan tarixiy o`zgarishlarga katta ta`sir ko`rsatgan. XV asrda Parijda uning sharafiga «Evropaning xaloskoriga» degan yodgorlik qo`yilgan. Amir Temur va Fransiya qiroli Sharl VI bir-biriga maktublar yuborib, aloqa o`rnatgan. Yozishmalarda siyosiy masalalar bilan bir qatorda savdo-iqtisodiy aloqalarga ham katta e`tibor qaratilgan.
Fransiyada buyuk Sohibqiron va temuriylar haqida ko`plab ilmiy, badiiy asarlar yaratilgan. Jumladan, fransuz mutafakkiri va adibi Volter asarida Mirzo Ulug`bek, mashhur yozuvchi Jyul Vern romanida Registon mahobati haqida to`lqinlanib yozilgan.
Bugun Fransiya delegasiyasi aynan shu maydonda bo`lib turibdi. Tungi chiroqlar bilan yoritilgan majmuaning ulug`vorligi va go`zalligi mehmonlarda katta zavq uyg`otdi.
Shu erda Shavkat Mirziyoev va Emmanuel Makron birgalikda suratga tushdi.
So`ng Prezidentlar “Buyuk ipak yo`li” xalqaro turizm markazidagi “Boqiy shahar” tarixiy-etnografik majmuasida bo`ldilar.
Bu erda xalqimizning buyuk o`tmishi ramzlari to`plangan, tarixiy shaharlarimizdagi diqqatga sazovor joylarining nusxalari barpo etilgan. Milliy an`analarimiz bilan birga do`st xalqlar bilan aloqalar tarixi ham aks ettirilgan. Xususan, Afrosiyob yodgorligi devorlarida saqlanib qolgan Koreya, Xitoy, Hindiston va boshqa mamlakatlar elchilarini qabul qilish marosimi tasvirlaridan foydalanilgan. Bunday ma`no-mazmun, tarix va bugungi kun uyg`unligi mehmonlarda katta taassurot qoldirdi.
Davlat rahbarlari o`rtasida samimiy muloqot bo`ldi. Samarqand jahon sivilizasiyasining qadimiy beshiklaridan biri bo`lgani, bugun ham xalqaro sammit va turizm markaziga aylanib borayotgani qayd etildi. Mehmonlarga xalqimizning betakror badiiy, hunarmandlik va musiqiy madaniyati namoyish etildi.
Tashrifning asosiy tadbirlari, shu jumladan, oliy darajadagi muzokaralar ertaga, 2 noyabr kuni bo`lib o`tadi.
