Rossiya Federasiyasi Bosh prokurori I.Krasnov taklifiga binoan O`zbekiston Respublikasi Bosh prokurori N.Yo`ldoshev boshchiligidagi prokuratura organlari delegasiyasi Rossiya Federasiyasiga tashrif buyurdi. Bu haqda Bosh prokuratura xabar berdi.
Mazkur tashrif doirasida joriy yilning 2 aprel kuni ikki davlat nazorat organlari rahbarlari o`rtasida uchrashuv bo`lib o`tdi.
Unda Rossiya Bosh prokurori Igor Krasnov 10 kun oldin Moskva viloyatida bo`lib o`tgan, yuzdan ortiq odamning umriga zomin bo`lgan, terrorchilik harakatini esga olib, ushbu xavf O`zbekiston uchun ham mavjudligini aytib o`tgan.
Konstruktiv muloqot davomida tomonlar O`zbekiston va Rossiya prokuratura organlari o`rtasidagi o`zaro huquqiy hamkorlik masalalarini, shuningdek, aloqalarni yanada rivojlantirishning istiqbolli yo`nalishlarini muhokama qildilar.
O`zbekiston Respublikasi Bosh prokurori prokuratura organlarida amalga oshirilayotgan islohotlar bilan tanishtirib, transmilliy uyushgan jinoyatchilikka, jumladan terrorizmga qarshi kurashishda sa`y-harakatlarni birlashtirish zaruratini ta`kidlab o`tdi.
Uchrashuv yakuniga ko`ra tomonlar O`zbekiston Respublikasi va Rossiya Federasiyasi Bosh prokuraturalari o`rtasida 2024-2025-yillarga mo`ljallangan Hamkorlik dasturini imzoladilar.
