Yarim yillik tanaffusdan so‘ng O‘zbekiston oltin eksportini qayta tikladi. Bu haqda Statistika qo‘mitasi ma’lumotlarida aytildi.
Ma’lum qilinishicha, joriy yilning dastlabki to‘rt oyida mamlakat 1,5 milliard AQSh dollari qiymatida oltin eksport qilgan.
Eksportning asosiy qismi aprel oyiga to‘g‘ri kelgan. O‘zbekiston yiliga qariyb 130 tonna oltin qazib oladigan davlatlar qatoriga kiradi. Shu bois oltin mamlakat iqtisodiyoti uchun muhim strategik resurs hisoblanadi. U nafaqat eksport tushumlarini oshiradi, balki byudjet barqarorligi hamda valyuta zaxiralarini mustahkamlashda ham muhim ahamiyat kasb etadi.
2025 yil sentyabridan keyin O‘zbekiston oltin eksportini amalda to‘xtatgan edi. Bu davrda Markaziy bank dunyodagi qimmatbaho metallning eng yirik xaridorlaridan biriga aylangan. Ya’ni mamlakat oltinni tashqi bozorga chiqarishdan ko‘ra, ichki zaxiralarni mustahkamlashni afzal ko‘rgan.
Ekspertlar bu qarorning bir nechta asosiy sabablarini keltirmoqda.
Birinchidan, jahon bozorida oltin narxi rekord darajaga etgan. Bunday vaziyatda shoshilinch sotuv emas, balki strategik kutish foydaliroq deb baholangan.
Ikkinchidan, oltin-valyuta zaxiralarini ko‘paytirish iqtisodiy xavfsizlikni ta’minlashda muhim vazifa hisoblanadi.
Oltin O‘zbekiston iqtisodiyotida o‘ziga xos “xavfsizlik yostiqchasi” vazifasini bajaradi. Jahon bozorlarida noaniqlik kuchayganda, valyuta kurslari tebranganda yoki tashqi savdo sharoitlari o‘zgarganda, oltin-valyuta zaxiralari mamlakatning moliyaviy barqarorligini saqlab qolishga yordam beradi.
Shu nuqtai nazardan, eksportning vaqtincha to‘xtatilishi O‘zbekiston uchun salbiy oqibatlarga olib kelmagan. Eksport qayta tiklanganidan so‘ng esa mamlakat qisqa muddat ichida 1,5 milliard dollar miqdorida daromad olgan.
