10 май куни Инновацион ривожланиш вазири Иброҳим Абдураҳмонов ҳамда Германия халқаро ҳамкорлик жамияти (GIZ) директори Йорг Пуделка 250 минг Евро қийматидаги «Замонавий инновацион марказлар – 2022» техник ёрдам лойиҳасини амалга ошириш тўғрисида Меморандум имзоладилар. Тадбирда Ўзбекистоннинг Германидаги Фавқулодда ва мухтор элчиси Набижон Қосимов, Инновацион ривожланиш вазирининг юқори мартабали маслаҳатчиси Карстен Ҳайнц, шунингдек, Ўзбекистон ва Германиянинг технопарклари раҳбарлари, олий таълим муассасалари проректорлари иштирок этдилар.
Лойиҳа 3 та асосий компонентдан иборат бўлиб, у илғор Германия тажрибасига таянган ҳолда инновацион марказлар ходимлари ва инновацион тизимнинг асосий иштирокчиларининг стажировкаларини ташкил этиш, аҳолининг инновациялар тўғрисида хабардорлигини оширишни ўз ичига олади.
Меморандум имзоланиши доирасида ўтказилган «Инновация марказлари – инновациялар катализатори» мавзусидаги онлайн семинарда мазкур лойиҳа Германия иқтисодий ҳамкорлик ва ривожланиш Федерал вазирлиги томонидан юқори баҳолангани ва қўллаб-қўллаб қувватлангани таъкидланди. GIZ ўз фаолияти давомида илк бора инновациялар соҳасидаги лойиҳани амалга ошираётгани эътиборга моликдир. Томонлар соҳа ривожланиши ва бу йўналишда малакали кадрлар тайёрлашнинг муҳимлигига алоҳида диққат қаратдилар ва бу йўналишдаги ҳамкорликни давом эттиришга келишдилар.
– Бугунги кунда республикамиз ҳудудларида инновацион инфратузилмаларни ташкил этарканмиз, кадрлар масаласи, уларнинг малакаси катта аҳамиятга эга, – деди Инновацион ривожланиш вазири И. Абдураҳмонов. – Инновациялар бўйича проректорлар масъуллигидаги илмий ишланмалари тижоратлаштириш марказларига умумий концепция ишлаб чиқиш ўта муҳим вазифадир. Вазирлигимиз ва GIZ ўртасидаги ўзаро Англашув Меморандуми республикамизда инновацион марказларни ривожлантириш, бошқариш соҳасини янги ва юқори поғонага кўтаришда катта туртки бўлиб хизмат қилади.
Меморандум доирасида Халқаро ҳамкорлик бўйича Германия жамиятининг (GIZ) беғараз грантлари асосида 15 нафар ўзбекистонлик инновация соҳасидаги мутахассислар Германияга малака оширишга юборилади, халқаро экспертлар ёрдамида «Инновацион марказларни бошқариш тўғрисида»ги қўлланма ишлаб чиқилади ҳамда Германиянинг инновация соҳаси тўғрисидаги лицензияланган ҳужжатли фильмлар мамлакатимиз телерадиоканаллари орқали кенг жамоатчиликка тақдим этилади.
Тадбирда Германия халқаро ҳамкорлик жамияти (GIZ) ваколатхонаси раҳбари Й.Пуделка охирги йилларда Германия ва Ўзбекистон ўртасидаги ҳамкорлик лойиҳалари тобора кенгайиб бораётганини алоҳида таъкидлаб, Ўзбекистон Германия халқаро ҳамкорлик жамиятининг Марказий Осиёдаги муҳим ҳамкорларидан эканини айтди.
Таъкидлаш лозимки, мазкур лойиҳа Ўзбекистонда алоҳида соҳаларни ва инсон капитали сифатини кучайтиришда катта аҳамият касб этади. Германия халқаро ҳамкорлик жамияти (GIZ) 1992 йилдан бошлаб Ўзбекистонда Германия Федерал Иқтисодий ҳамкорлик ва ривожланиш вазирлиги ва бошқа қатор вазирлик ва идоралар лойиҳаларини амалга оширади. Ҳозирги кунда, GIZ Ўзбекистонда иқтисодиёт, соғлиқни сақлаш, таълим, табиий ресурслар муҳофазаси, шунингдек, ижтимоий ва маданий интеграцияни ривожлантириш соҳаларидаги ислоҳотларни қўллаб келмоқда. Инновацион марказларни ривожлантириш Германия ва Ўзбекистон ўртасидаги янги соҳа бўлиб, келажакда ҳамкорликнинг долзарб йўналишларидан бири бўлиши кутилмоқда.
