4 февраль куни Маданият вазирлигида вазир Озодбек Назарбековнинг журналистлар билан учрашуви ташкил этилди. “Ҳамкорлик вакцинаси” деб номланган ушбу учрашувда маданият вазири соҳадаги муаммоларни ўртага ташлаш ва ҳал этишда журналистлар ва блогерларни ҳамкорликка чақирди ва соҳани ривожлантиришда таклиф беришларини сўради. Бу ҳақда “Даракчи” мухбири Муниса Алиева хабар берди.
Озодбек Назарбеков учрашувда маданият соҳаси ислоҳотга муҳтож экани ҳақида гапирди:
— Маданият соҳаси бошқа соҳаларга қараганда ислоҳотга муҳтож. Шу сабабли журналист ва блогерларни ҳамкорликка чақирмоқчиманки, соҳадаги муаммоларни, ислоҳотларни биргаликда амалга оширайлик. Чунки мен ҳам соҳани икир-чикиригача биламан, деб айтолмайман. Соҳа бир ёқлама эмас, у ранг-баранг, турли йўналишларга бўлинади. Жамиятнинг дунёқараши билан тўқнаш келадиган соҳа бу. Ва бунда албатта, фидойи инсонлар ишлаши керак.
Нима учун ислоҳотга муҳтожмиз? Жамиятга “маданиятингни тузат” деб айта олишимиз учун аввало, соҳа вакиллари маданиятли бўлиши керак. Ҳар бир ходимимиз буни ҳис қилиб ишлаши, жамият ҳам маданият ходими аслида қандай бўлиши кераклигини эслатиб туриши, талабларини столимиз устига қўйиши зарур. Табиийки, бунга чидаганлар қолади, чидамаганлар бу майдонни тарк этади. Ўшанда ривожланиш бўлади. Соҳада шунчаки меҳнат дафтарчасини тўлдириб юрган одамлар ишдан кетади. Уларнинг ўрнини босадиган ҳақиқий мутахассислар келади.
Эслатиб ўтамиз, Озодбек Назарбеков жорий йилнинг 22 январь куни Олий Мажлис Қонунчилик палатаси томонидан Ўзбекистон маданият вазири лавозимига маъқулланган, 24 январь куни эса Президент томонидан тасдиқланган эди. У бунгача маданият вазирининг биринчи ўринбосари эди.
Аввалги маданият вазири Бахтиёр Сайфуллаев Президент томонидан янги шакллантирилган Сенатнинг аъзоси этиб тайинланди — у энди парламент юқори палатасида Ёшлар, маданият ва спорт масалалари қўмитасига раислик қилади.
