O`zbekiston Jahon xayriya indeksida 53-o`rindan 29-o`ringa ko`tarildi

Xalqaro reyting va indekslar bilan ishlash bo`yicha respublika kengashining yig`ilishi bo`lib o`tdi, deb xabar bermoqda «Dunyo» AA muxbiri Oliy Majlis Senati ma`lumotiga asoslanib.

Videokonferensaloqa tarzida o`tkazilgan yig`ilishni Senat raisi, Kengash raisi Tanzila Norboeva olib bordi.

Yig`ilishda ijtimoiy-iqtisodiy va siyosiy-huquqiy sohaga oid ustuvor xalqaro reyting va indekslarda O`zbekistonning o`rnini yaxshilash bo`yicha 2021 yilga mo`ljallangan chora-tadbirlar rejasining birinchi yarim yillikdagi ijrosi, Jahon iqtisodiy forumining Global raqobatbardoshlik indeksida O`zbekistonning o`rnini aks ettirish bo`yicha chora-tadbirlar rejasining ijrosi muhokama qilindi.

Bundan tashqari davlatimiz rahbarining 2021 yil 14 yanvardagi «O`zbekiston Respublikasida huquq ustuvorligini ta`minlash holatini aniqlashning samarali mexanizmini joriy etish chora-tadbirlari to`g`risida»gi qarorining ijrosi to`g`risidagi masalalar muhokama qilindi.

Qayd etilganidek, so`nggi uch oy davomida bir qator xalqaro reytinglarda mamlakatimiz o`rni yaxshilandi. Xususan, «S&P» Global Ratings tomonidan yuritiladigan suveren kredit reytingida mamlakatimiz reyting prognozi «salbiy»dan «barqaror»ga oshirildi. Parlamentlararo ittifoq tomonidan yuritiladigan «Siyosatdagi ayollar» jahon reytingining «Parlamentdagi ayollar» qismida O`zbekiston 130-o`rindan 45-o`ringa ko`tarildi. Jahon xayriya indeksida 114 ta davlat orasida mamlakatimiz 53-o`rindan 29-o`ringa, ya`ni deyarli ikki baravar ko`tarildi.

Yig`ilishda Respublika kengashi tomonidan 532 banddan iborat 2021 yilga mo`ljallangan ish rejasi tasdiqlangan bo`lib, birinchi yarim yillikda ijtimoiy-iqtisodiy sohada bajarilishi belgilangan 272 ta banddan 76 tasi bajarilganligi, 188 tasi bajarilayotganligi va 8 tasi bajarilmaganligi, siyosiy-huquqiy sohada 86 ta banddan 32 tasi bajarilganligi, 50 tasi bajarilayotganligi va 4 tasi bajarilmaganligi ta`kidlandi.

Tadbirda Jahon iqtisodiy forumining Global raqobatbardoshlik indeksida O`zbekistonning o`rnini aks ettirish bo`yicha chora-tadbirlar rejasining ijrosi ham muhokama qilindi.

Muhokama davomida hududlarning huquq ustuvorligi indeksini aniqlash uchun zarur bo`lgan statistik ma`lumotlarni “Huquq ustuvorligi” avtomatlashtirilgan axborot tizimiga (huquq.indikator.uz) kiritishda mutasaddi tashkilotlar tomonidan sustkashlikka yo`l qo`yilayotganligi qayd etildi. Bu esa Tizimga kiritilgan ma`lumotlarni umumlashtirgan holda o`tgan hisobot yili uchun Hududlarning huquq ustuvorligi indeksini o`z vaqtida tuzish imkonini bermayotgani ta`kidlandi.

Shuningdek, yig`ilishda mas`ul vazirlik va idoralar axboroti eshitilib, yo`l qo`yilgan kamchiliklarni bartaraf etish va belgilangan vazifalar ijrosi yuzasidan bir oy muddatda Respublika kengashiga tegishli axborot kiritilishi vazifasi qo`yildi.