FIFA kunlari doirasida Janubiy Koreyada yig`in tashkil etgan O`zbekiston milliy terma jamoasi bugun Kosta-Rika terma jamoasiga qarshi bahs olib bordi.
"Garchi uchrashuvda hisobni terma jamoamiz sardori Eldor Shomurodov 26-daqiqada ochgan bo`lsa-da, yakunda vakillarimiz o`z darvozalaridan ikkita to`p o`tkazib yuborishdi va alamli mag`lubiyatni qabul qilib oldi. Xolbuki, vakillarimiz birinchi bo`limning o`zidayoq hisobni oshirishi mumkin edi", – deyiladi O`zbekiston Sportni rivojlantirish vaziriligining sharhida.
Ikkinchi bo`limda ham vakillarimiz qulay vaziyatlarga ega bo`lishgan.
"Eldor Shomurodovning o`zi yuzaga kelgan imkoniyatlardan samarali foydalana olganida xet-trek muallifiga aylanishi muqarrar edi, ammo...
Futbolda “sen urmasang, senga urishadi” degan yozilmagan qoida bor. Ana shu qoida bu safar yana tasdig`ini topdi. Asosiy vaqtga qo`shib berilgan daqiqalarda, aniqrog`i 90+2 va 90-4-daqiqalarda Kosta-Rika terma jamoasi a`zolari O`tkir Yusupov darvozasini ishg`ol qilishdi va yakunda g`alabani ilib ketishdi.
Shu tariqa Katanes shogirdlarining 7 o`yindan iborat g`alabali seriyasiga barham berildi", – deydi sharhlovchi.
O`rtoqlik uchrashuvi. O`zbekiston m.t.j. – Kosta-Rika m.t.j. – 1:2.
Gollar: Eldor Shomurodov (26) – Entoni Ernandes (90+2), Kendall Uoston (90+4).
O`zbekiston m.t.j.: O`tkir Yusupov, Umar Eshmurodov, Husniddin Aliqulov, Sherzod Nasrullaev (Farrux Sayfiev 72), Hojiakbar Alijonov, Otabek Shukurov, Odil Hamrobekov, Sardor Sobirxo`jaev (Akmal Mozgovoy 72), Aziz Turg`unboev (Ibrohimxalil Yo`ldoshev 57), Hojimat Erkinov (Oybek Bozorov 57), Eldor Shomurodov (Igor Sergeev 72).
