ФИФА кунлари доирасида Жанубий Кореяда йиғин ташкил этган Ўзбекистон миллий терма жамоаси бугун Коста-Рика терма жамоасига қарши баҳс олиб борди.
"Гарчи учрашувда ҳисобни терма жамоамиз сардори Элдор Шомуродов 26-дақиқада очган бўлса-да, якунда вакилларимиз ўз дарвозаларидан иккита тўп ўтказиб юборишди ва аламли мағлубиятни қабул қилиб олди. Холбуки, вакилларимиз биринчи бўлимнинг ўзидаёқ ҳисобни ошириши мумкин эди", – дейилади Ўзбекистон Спортни ривожлантириш вазирилигининг шарҳида.
Иккинчи бўлимда ҳам вакилларимиз қулай вазиятларга эга бўлишган.
"Элдор Шомуродовнинг ўзи юзага келган имкониятлардан самарали фойдалана олганида хет-трек муаллифига айланиши муқаррар эди, аммо...
Футболда “сен урмасанг, сенга уришади” деган ёзилмаган қоида бор. Ана шу қоида бу сафар яна тасдиғини топди. Асосий вақтга қўшиб берилган дақиқаларда, аниқроғи 90+2 ва 90-4-дақиқаларда Коста-Рика терма жамоаси аъзолари Ўткир Юсупов дарвозасини ишғол қилишди ва якунда ғалабани илиб кетишди.
Шу тариқа Катанес шогирдларининг 7 ўйиндан иборат ғалабали сериясига барҳам берилди", – дейди шарҳловчи.
Ўртоқлик учрашуви. Ўзбекистон м.т.ж. – Коста-Рика м.т.ж. – 1:2.
Голлар: Элдор Шомуродов (26) – Энтони Эрнандес (90+2), Кендалл Уостон (90+4).
Ўзбекистон м.т.ж.: Ўткир Юсупов, Умар Эшмуродов, Ҳусниддин Алиқулов, Шерзод Насруллаев (Фаррух Сайфиев 72), Ҳожиакбар Алижонов, Отабек Шукуров, Одил Ҳамробеков, Сардор Собирхўжаев (Акмал Мозговой 72), Азиз Турғунбоев (Иброҳимхалил Йўлдошев 57), Ҳожимат Эркинов (Ойбек Бозоров 57), Элдор Шомуродов (Игор Сергеев 72).
