Joriy yilning 8-9 oktyabr kunlari Samarqandda barpo etilgan “Boqiy shahar” majmuasi atrofida, eshkak eshish kanali bo`yida triatlon bo`yicha Osiyo kubogi musobaqasi o`tkaziladi. Unda 30 dan ortiq mamlakatning 70 nafar atleti Parij-2024 olimpiadasiga qimmatli reyting ochkolarini qo`lga kiritish uchun musobaqalashadi.
Shu munosabat bilan bugun poytaxtimizdagi “Hilton” mehmonxonasida mazkur musobaqaga bag`ishlangan matbuot anjumani tashkil etildi. Unda Sportni rivojlantirish vaziri o`rinbosari Shahrullo Mahmudov, Milliy Olimpiya qo`mitasi Bosh kotibi Oybek Qosimov, O`zbekiston triatlon federasiyasi Bosh kotibi Elena Kun hamda triathlon terma jamoamizning a`zosi Aleksandr Kurashov va OAV xodimlari ishtirok etishdi.
Tadbirda O`zbekiston triatlon federasiyasi bosh kotibi Elena Kun nega ushbu musobaqa aynan Samarqandda o`tkazilishiga quyidagicha izoh berdi:
“Xalqaro talablarga javob beradigan eshkak eshish kanalida triatlonning ochiq havzada suzish musobaqalarini tashkil etish uchun barcha sharoitlar yaratilgan.
Qolaversa, ushbu sport majmuasi atrofidagi yugurish va velosport musobaqalarini o`tkazishga mos keladigan yo`laklar ham xorijlik mehmonlarni xushnud etishiga ishonaman. Mana shunday sharoitlarga ega majmuadan foydalanmaslik, sportga xiyonat va Samarqandda ushbu musobaqa yuqori saviyada tashkil etilishiga ishonaman”.
Ma`lumot uchun, bu yilgi musobaqalarda qatnashish istagini bildirgan sportchilar o`tgan yilgiga qaraganda 3 baravar ko`paygan.
Oybek Shukurov
