"Surxon" klubining rossiyalik futbolchisi Shamil Gasanov Moskvada giyohvand moddalar bilan ushlandi. Bu haqda Shot Telegram kanali xabar bermoqda.
Manbaga ko`ra, 6 iyun kuni sportchi Borovskoe shossesini noto`g`ri joyidan yugurib o`tgan va buning uchun uni Yo`l-patrul polisiyasi to`xtatgan.
Huquq-tartibot idoralari xodimlari Gasanov asabiylasha boshlaganini payqab, uni tekshirishga qaror qilishdi. Futbolchining cho`ntagidan ko`k rangli izolenta bilan o`ralgan paket topilgan.
Ekspertiza o`ramdagi moddaning mefedron ekanligini aniqladi. Gasanovga nisbatan Rossiya Federasiyasi Jinoyat kodeksining 228-moddasi (“Giyohvandlik vositalarini qonunga xilof ravishda olish, saqlash, tashish”) bilan jinoyat ishi qo`zg`atilgan. Futbolchi hozirda uy qamog`ida saqlanmoqda.
Ma`lumot uchun, Shamil Gasanov joriy yilning 25 yanvar kuni Maxachqal`aning "Dinamo" klubidan Surxondaryoning "Surxon" jamoasiga kelib qo`shilgandi.
