G`arbiy Qozog`iston viloyatida 113 kishida baliq orqali yuqadigan parazit qurtlar qo`zg`atuvchi opistorxoz kasalligi aniqlandi, deya yozdi "nur.kz"
G`arbiy Qozog`iston viloyati sanitariya-epidemiologiya nazorati boshqarmasi vakillarining ma`lum qilishicha, yil boshidan buyon viloyatda 113 ta opistorxoz kasalligi qayd etilgan. Qayd etilishicha, bunday holatlar o`tgan yilning shu davriga nisbatan 26 foizga oshgan. "Opistorxoz - bu baliq orqali yuqadigan gijjaga o`xshash kasallik. Tashxis najas yoki safroda gelmint tuxumlari aniqlanganda tasdiqlanadi. Kasallikning ko`payishiga baliqni noma`lum savdo joylarida sotib olish, shaxsiy gigiena qoidalariga rioya qilmaslik sabab bo`lgan bo`lishi mumkin”, - deyiladi xabarda. Mutaxassislarning fikriga ko`ra, opistorxozning asosiy belgilari: yuz va tanada toshma; tana haroratining 37-38 darajaga ko`tarilishi, bu to`rt haftagacha davom etadi; ikki haftagacha davom etadigan bosh og`rig`i; uyqu buzilishi, zaiflik, terlash va ishtahani yo`qotish; o`ng tomonda yoki elkada, mushaklarda og`riq; allergik reaksiyalar.
"Agar kasallik to`liq davolanmasa, u jigar kasalligiga, o`t yo`llarining yallig`lanishiga va yurak kasalliklariga olib kelishi mumkin", deb ta`kidladi SES bo`limi. Shuningdek, qozog`istonliklar ushbu kasallikning asosiy manbai daryolarda yashovchi sazan oilasi baliqlari ekanligi haqida ogohlantirildi. Shuning uchun sog`liqni saqlash shifokorlari tavsiya qiladilar: sazan oilasining xom, etarli darajada tuzlanmagan, yomon quritilgan baliqlarini iste`mol qilmaslik; xom baliqni kesish paytida yoki undan keyin shaxsiy gigiena qoidalariga qat`iy rioya qilish; baliqni kamida 20 daqiqa qovurish.
Ma`lumot uchun, sentyabr oyi o`rtalarida Qarag`anda viloyatida brutselloz kasalligi avj olgani ma`lum bo`lgan edi. Bundan tashqari, Abay viloyati Beskarag`ay tumani, Jetijar qishlog`ida kuydirgi kasalligi sababli favqulodda holat e`lon qilingan. Shu bilan birga, avgust oyi oxirida Oqmo`la viloyatidagi qishloqlardan birida 12 kishi kuydirgi kasalligiga chalingan edi. Ular kasalxonaga yotqizilgan, qishloqning o`zi esa karantinga olingan.
