Maʼlum qilinishicha, taqdimotda 2025 yil davomida amalga oshirilgan ishlar hamda 2026 yildagi ustuvor vazifalar muhokama qilingan.
Qayd etilishicha, o‘tgan yili O‘zbekistonning JSTga a’zo bo‘lishi bo‘yicha ishchi guruhning ikkita yig‘ilishi o‘tkazilgan. Ularda 200 dan ortiq savollarga javoblar hamda tashqi savdoga oid 30 dan ziyod hujjat tashkilot a’zolariga taqdim etilgan.
Shu bilan birga, ikki tomonlama muzokaralar doirasida 40 dan ortiq muzokaralar raundi bo‘lib o‘tgan. 2025 yilning o‘zida 11 davlat bilan muzokaralar yakunlangan va bu borada kelishuvga erishilgan davlatlar soni 33 taga yetgan.
Prezident matbuot xizmatiga ko‘ra, JST a’zolari O‘zbekistonda bozor iqtisodiyotiga o‘tish doirasida amalga oshirilayotgan islohotlarni ijobiy baholamoqda.
Xususan, o‘tgan yil davomida 68 ta qonunchilik hujjati JST talablari va xalqaro me’yorlarga moslashtirilgan.
Jumladan, intellektual mulkni ro‘yxatdan o‘tkazish jarayonlari soddalashtirilgan, bu sohadagi huquqbuzarliklar uchun javobgarlik kuchaytirilgan.
Shuningdek, eksport cheklovlari bekor qilinib, eksport bojlari uchun shaffof mexanizm joriy etilgan. Ayrim mahsulotlar bo‘yicha minimal eksport narxlarini belgilash amaliyoti ham tugatilgan.
Savdodagi texnik to‘siqlarni qisqartirish va sanitariya-fitosanitariya sohasidagi islohotlar doirasida yuqori xavfli mahsulotlarni davlat ro‘yxatidan o‘tkazish tartibi o‘rniga sertifikatlash tizimi joriy qilingan.
Oziq-ovqat mahsulotlari xavfsizligi ustidan nazorat esa Sanitariya-epidemiologik osoyishtalik va jamoat salomatligi qo‘mitasiga o‘tkazilgan.
Bundan tashqari, 14 ta oziq-ovqat texnik reglamenti bekor qilingan, 747 ta tovar pozitsiyasi bo‘yicha majburiy sertifikatlash talablari tugatilgani aytildi.
Taqdimotda oziq-ovqat xavfsizligi, savdoni himoya qilish choralari hamda sanitariya, veterinariya va karantin sohasida xavf tahlili tizimini joriy etish masalalari ham ko‘rib chiqilgan.
Yakunda Prezident mutasaddilarga O‘zbekistonning JSTga to‘laqonli a’zoligini rasmiylashtirish jarayonini tezlashtirish bo‘yicha topshiriqlar bergan.
Shuningdek, tashqi iqtisodiy faoliyatga oid qonunchilikni xalqaro savdo standartlariga to‘liq muvofiqlashtirish, ikki va ko‘p tomonlama muzokaralarni yakunlash hamda a’zolikni rasmiylashtirish bo‘yicha zarur choralarni ko‘rish vazifasi belgilangan.
