Сурхондарёнинг Шўрчисидан бўлган 25 ёшли Эшпўлат ҳозир ҳунарманд косиб. Қўлида 15 нафар шогирди бор. Уларни ўқитгани учун яхшигина ойлик олади. Тайёр бўлган оёқ кийимларни бозорга обориб сотиб, ундан ҳам фойда қилади. Шогирдлари эса ҳам касб ўрганади, ўқиётгани учун стипендия ҳам олишади. Хуллас, Эшпўлатнинг тадбиркорлигидан ҳамма манфаатдор. Бу манфаатдор жамоанинг шаклланиши, қахрамонимизнинг бу кунгача босиб ўтган йўли кўпчиликни қизиқтириб қўйиши тайин. Эшпўлат ишни нимадан бошлади? Унга кимлар, қандай ёрдам беришди? Бугун кимгадир ўрнак, кимгадир йўл-йўриқ бўла оладиган қаҳрамонимизнинг ҳаёти ҳақида ҳикоя қиламиз.
Сигирни сотишдан бошланган илк қадам
Тошкентга илк мартта абитуриент бўлиб борган Эшпўлат ўқишга киролмагач, пойтахтда ишлаб қолишга қарор қилади. У ерда оёқ кийим фабрикаларидан бирига ишга кириб, поябзал тикиш сир-асрорларини ўрганиб олади. 2 йил ичида у ўзи мустақил равишда оёқ кийимларни тайёр ҳолга келтира оладиган устага айланади. Уйига қайтиб келгач эса унинг олдида иккита йўл бор эди: ё ишлари юришиб кетиб тадбиркорга айланиш, ёки ҳамма қатори тақдирга тан бериб, “олма пиш, оғзимга туш” деб ўтириш. Тадбиркорга айланиш эса осон эмас. Бунинг учун пул, ўзига ишонч ва бу йўлда бошқаларни ҳам ишонтира олиш керак. У биринчи йўлни танлади. Оиласидагилар аввалига унга ишонишмаган бўлса-да, уйидаги сигирини бозорга чиқариб шартта сотиб, Тошкентга жўнаб кетди...
“Биринчи тиккан оёқ кийимларим ўз шаклини йўқотиб қўйган”
“Тошкентга бориб, сигиримни сотган пулимга 10 та қолип, оёқ кийим андозаси ва ҳом-ашёларни олиб қайтганман. Аввалига маҳсулотни нотўғри танлаганим учун биринчи тиккан оёқ кийимларим юмшоқ чиқиб, ўз шаклини йўқотиб қўйган. Кейин бу хатони такрорламасдан, тўғри ҳом-ашё танлашни ҳам ўргандим, - дейди қаҳрамонимиз, - Аввалига ота-онам мустақил иш бошлашимга қаршилик қилишди. Ишонишмади, шекилли. Бугун эса қўллаб-қувватлашмоқда. Туманимизда косибчилик билан шуғулланадиганлар йўқ. Бу янги йўналиш бўлгани учун ўзимга ишончимни сўндирмаганман.”
Бугун у ҳам тадбиркор, ҳам устоз
Эшпўлат ўз уйида 10 та қолип ва битта қўлбола печ билан ишлаб юрган пайтлар эди. Пандемия, карантин, камбағаликка қарши курашиш... Шўрчи тумани прокурори Илҳом Таиров айнан мана шу ташвишлар билан юрган пайтда Эшпўлат ҳақида эшитиб қолиб, уни уйига топиб боради. Мақсад эса уста-косибни даромадга йўналтириш орқали унинг тажрибасидан ҳам унумли фойдаланиш эди. Прокурор ташаббуси билан туманнинг “Ҳурлик” маҳалласидаги Агросаноат коллежи биносида ташкил этилган ҳунармандчилик ўқув курсида қаҳрамонимиз бугун 10 дан ортиқ йигит-қизларга косибчиликни ўргатмоқда. Меҳнат шароити ҳам яхшиланиб, ўқув хонаси, косибчилик анжомлари билан таъминлаб берилган. Ундан сўраладигани эса ўзидан кейинги шогирдларига касб сирларини ўргатишдир. Туман прокурори Илҳом Таировнинг айтишича, жамоа тўлақонли шакллангач, Эшпўлатга ишлаб чиқариш корхонасини очиш учун ҳам кўмак кўрсатилади. Шогирдлари билан биргаликда ишлаб чиқариш ҳажми ортган косибимиз ҳозирда тайёр маҳсулотларини туман бозорларига олиб чиқиб, ойлик 5-6 млн. сўм соф фойда олаётганини таъкидлади. Бундан ташқари, устоз-шогирдлик мактабида ҳам унга 1,8 млн. сўмлик ойлик маош ва шогирдларига 239 минг сўм бандлик стипендиялари ҳам тайинланган.
Бунга қандай эришилди?
Шўрчи тумани Аҳоли бандлигига кўмаклашиш маркази мутахассиси Баҳром Мадатов косиб Эшпўлат Ҳасанов мисолида бандлик стипендияси ва ойлиги ҳақида тушунтириш берди:
— Устоз-шогирдлик анъанаси асосида ҳунармандчилик ўқув курслари ташкил қилмоқчи бўлганлар, аввало, Ҳунармандлар марказидан рўйхатдан ўтиб, ҳунармандчилик гувоҳномасини қўлга киритишлари керак. Ўқув курси ташкил этилиб, шогирдлари сони 10 тадан 30 тагача етганда ҳудудий бандлик марказига ариза билан мурожаат қилади. Эшпўлат Ҳасановнинг ҳам шогирдлари сони бугунги кунда 15 тага етган. Ўқувчилар икки ой мобайнида косиблик сир-асрорларини ўрганиш баробарида ҳар ойда 239 минг сўмдан бандлик стипендияси олишади.
Хулоса ўрнида
Сектор раҳбарларининг халқ ичида юриб, асл ҳолатдан бохабар бўлишининг фойдаси катта. Қаҳрамонимиз Эшпўлат Ҳасановнинг ҳам ҳолидан хабар олинмаганида, унга йўналиш берилмаганида, балки, у ҳамон эски печида оёқ кийим тикаётган бўлармиди. Бугун у тадбиркор сифатида ҳам ўзига, ҳам шогирдларига, ҳам жамиятга фойдаси тегяпти. Мақсад ҳам шу. Яқин келажакда қаҳрамонимизнинг ўз бренди асосида поябзал ишлаб чиқариш корхонасини ташкил этиб, катта тадбиркорга ҳам айланишига ишонамиз.
Сардорбек Раҳмонқулов
