Олий Мажлис Сенатининг кечаги ялпи мажлисида Сенат раиси Танзила Норбоева парламент учун биринчи галдаги муҳим маласи – бу бюджет масаласи эканини қайд этди. Бу соҳада талон-торожликларга чек қўйиш керак, деди дея хабар берди Сенат Ахборот хизмати.
- Ўтган йилда 2,5 мингдан зиёд бюджет муассасасида 301 миллиард сўмдан ортиқ бюджет маблағлари талон-тарож қилинган, - деди Сенат раиси. - Нархларни сунъий ошириш орқали давлат харидларини амалга ошириш ҳолатлари аниқланганлиги ташвишли ҳол. Коррупцияга қўл урган мансабдор шахслар сони кўпайиб бораётгани (2019 йилда 1 минг 339 нафар, 2020 йилда 1 минг 723 нафар) мазкур иллатга қарши курашишни янада кучайтиришни тақозо этади.
Куни кеча Президентимиз раҳбарлигида хизмат кўрсатиш соҳасини ривожлантириш масалалари бўйича бўлиб ўтган видеоселектор йиғилишида ҳам бу борадаги жиддий камчиликлар кўрсатиб ўтилди. Айниқса, қурилиш, тиббиёт, мактабгача таълим соҳаларида коррупция ҳолатлари кўпайгани таъкидланди.
Таҳлилларга кўра, қурилиш соҳасидаги 44 қонун ҳужжати экспертизадан ўтказилганда, уларнинг ярмида (23 тасида) 124 та; соғлиқни сақлаш соҳасидаги 70 қонун ҳужжатининг 19 фоизида (13 тасида) 41 та; Таълим соҳасидаги 96 қонун ҳужжатининг 18 фоизида (17 тасида) 81 коррупциявий омиллар аниқланган.
Т.Норбоева шулардан келиб чиқиб, прокуратура мазкур йўналишдаги ишларда таъсирчан ва қатъий чоралар қўллаши, Коррупцияга қарши курашиш миллий кенгашига аниқ таклифлар киритиши зарурлигини таъкидлади.
Мажлисда тадбиркорликни қўллаб-қувватлаш борасида жойлардаги мутасаддилар масъулиятни тўла хис қилмаётгани танқид қилинди. Зеро, мазкур субъектлар давлат бюджетини кўпайтиришда, халқ фаровонлигини оширишда ҳал қилувчи бўғиндир.
Хусусан, 5 минг 200 дан зиёд тадбиркор ҳуқуқлари бузилган. Тадбиркоролар манфаатларига зид келувчи 350 дан зиёд ноқонуний ҳужжат чиқарилган. 24 мингга яқин тадбиркорнинг турли йўналишлардаги (кредит, ер, бино, коммуникация, лицензия) муаммолари фақатгина прокуратура органларининг аралушувидан кейин ҳал қилинган.
Қишлоқ хўжалигида ердан самарали фойдаланишга етарлича эътибор қаратилмаганлиги оқибатида 10 минг гектардан зиёд ер ўзбошимчалик билан эгалланган. Қарийб 14 минг гектар ердан мақсадсиз фойдаланилган.
78 минг гектардан зиёд ер қонунга хилоф тарзда ажратилган. Минглаб тонна уруғлик, минерал ўғит, нефть маҳсулотлари ва бошқа ресурслар ноқонуний эгалланган.
2019 йилда ирригация, мелиорация тадбирлари учун ажратилган 1,7 миллиард сўм маблағ талон-торож қилинган бўлса, ўтган йилда бундай талон-торожликлар қарийб ўн баробарга ошиб, 16 миллиард сўмни ташкил этган. Мазкур йўналишда 2019 йилда 92 та жиноят аниқланган бўлса, ўтган йилда бу рақам қарийб тўрт баробарга ошиб, 359 тани ташкил этган.
Сенат мажлисида шу каби камчиликларни бартараф этиш, кегусида йўл қўймаслик бўйича топшириқлар берилди.
