2020 йилда судлар олдида халқимизнинг судларга бўлган ишончини ошириш ва судларнинг чинакам мустақиллигини таъминлашдек ўта муҳим вазифа турибди. Бунинг учун судьялар халқ билан ҳамнафас ҳолда иш олиб бориши, уларнинг суд билан боғлиқ муаммоларини уйма-уй юриб ҳал қилиши муҳим аҳамиятга эга...
Ҳаммамизга маълумки, жиноят қонунчилигимизда инсонпарварлик принципига тўла мос келадиган яраштирув институти мавжуд.
Йўл-транспорт ҳодисаси натижасида шахсга оғир ёки ўртача оғир шикаст етказилган ҳолатларда бу тоифадаги жиноят ишлари бўйича тарафларни яраштириш жабрланувчининг бузилган ҳуқуқларини тиклашда ва иш бўйича айбланувчиларни жиноий жавобгарликка тортмасдан туриб, уларни ахлоқан тузатишда жуда ҳам самарали ҳисобланади.
Бунинг учун оғир ёки ўртача оғир шикастланган жабрланувчини судга чақиртириш уларни овора-сарсон бўлишларига, яраштирув жараёнига нисбатан уларда турли эътирозлар келиб чиқишига олиб келиши мумкин.
Шунинг учун, жиноят ишлари бўйича Тошлоқ туман суди бу тоифадаги ишларни кўришда бевосита сайёр суд мажлисларини жабрланувчиларнинг хонадонларига бориб ўтказишга, улар билан самимий суҳбатлашиб, тегишли қарорлар қабул қилишга алоҳида эътибор қаратмоқда.
Жумладан, 2020 йилнинг биринчи иш куни жиноят ишлари бўйича Тошлоқ туман суди иш юритувидаги йўл-транспорт ҳодисаси билан боғлиқ 3 та жиноят ишларини жабрланувчиларнинг хонадонларида сайёр суд мажлисларида кўриб чиқди. Натижада, жабрланувчилар иш бўйича айбланувчилар билан ўз ихтиёрлари билан ярашиб олишди ва суд-ҳуқуқ соҳасида олиб борилаётган ислоҳотлар жараёнидан мамнунликларини яширишмади.
“ТЕРГОВ ОРГАНИГА БОРИБ-КЕЛИШДАН ОЧИҒИ ЧАРЧАГАНДИМ...”
Ибрагим Шукуров, жабрланувчи:
— Кўп йиллар ўқитувчи бўлиб ишлаганман. Ёшларга таълим-тарбия бериш борасида қилган камтарона меҳнатимни давлатимиз юксак қадрлаб “Шуҳрат” медалига сазовор бўлдим. Йўл-транспорт ҳодисасини содир қилиб, менинг ўртача оғир шикаст олишимга сабабчи бўлган айбланувчи билан яраштириш учун тергов органи мени бир неча марта чақиртирган эди. Ёшим 70 дан ошганлиги учун тергов органига бориб-келишдан очиғи чарчагандим. Менга жиноят ишлари бўйича Тошлоқ туман судидан қўнғироқ қилиб, “хондонингизга судья боради. Ўша ерда яраштириш бўйича иш кўрилади”, деб хабар беришганида очиғи жуда ажабландим. Лекин, судья хонадонимга келиб, мен билан самимий суҳбатлашиб, яраштириш бўйича қонун талабларини тўлиқ тушунтирганида жуда ҳам кўнглим кўтарилди. Очиғи, бу кутилмаган ҳолат бўлди. Ҳатто, шу кунга қадар билмаган қонундаги ҳуқуқимни судьядан билиб олдим. Яъни, “Шуҳрат” медалига сазовор бўлганларга солиқ қонунчилиги бўйича айрим солиқ турларидан имтиёзлар берилар экан. Президентимизга раҳмат. Бу – улар бошчилигида олиб борилаётган суд соҳасидаги ислоҳотлар самараси.
Садоқат Аллаберганова
