Murojaatlaringizga huquqshunos Durdona NAZAROVA javob beradi.
Eslatib o`tamiz, mutaxassislar izohi tavsiyaviy xarakterga ega.
«ONA-BOLANING TILI BIR!»
— Turmush o`rtog`imning vafot etganiga 10 yil bo`ldi. Farzandlarimni bir o`zim tarbiyalayman. Biz yashab kelayotgan uyning yarmi kichik qizimga, qolgani esa qaynonamning nomiga rasmiylashtirilgan. Ayni dam qaynonam qaynisinglim bilan til biriktirib, bizni uydan haydashayapti. Uy hujjatlarini ham olib qo`yishgan. Qaynonam hovlining ikkinchi yarmini ham o`z nomiga o`tkazmoqchi. Bu ishni qizimning roziligisiz bajarishi ham mumkinmi?
Muharram Mo`minova, Zangiota tumani
— Agar qizingiz voyaga etgan bo`lsa, nizoli uyning tegishli qismini o`zgalar nomiga tasarruf etish bilan bog`liq harakatlar, albatta uy mulkdori, ya`ni farzandingizning roziligisiz amalga oshirilmaydi. Bordi-yu, qizingiz voyaga etmagan bo`lsa, mulkni tasarruf etish masalasi uning qonuniy vakillari ota-onasi, vasiy va homiylik organlarining roziligi bilan bolaning manfaatini ko`zlagan holda bajariladi.
«ONAM, NABIRALARIGA VASIY BO`LOLADIMI?»
— Ajrashganman. Ikki nafar farzandim bor. Sobiq erim ichkilikka mukkasidan ketgan odam. Otalik huquqidan mahrum etilgan. Aliment ham to`lamaydi. To`ng`ichim 18 yosh, kichigi 16 ga kirdi. Onam ularni o`z qaramog`iga olib, vasiy bo`lmoqchi. Shunday qilinsa bo`ladimi?
Ismi sir tutildi.
— Voyaga etmagan bolalarning manfaatlarini himoya qilish maqsadida ular ota-onasiz yoki turli sabablarga ko`ra qarovsiz qolgan hollardagina vasiy yoki homiy tayinlanishi mumkin.
«O`G`LIMGA UY TALAB QILOLAMANMI?»
— 13 yil avval erim bilan ajrashganmiz. Ammo nikohimiz qonunan bekor qilinmagan. U qayta uylandi, farzandlari bor. O`g`lim ikkimiz hali ham kelin bo`lib tushgan xonadon «propiska»sida turamiz. Turar-joy ro`yxatida bo`lganimiz munosabati bilan o`g`lim uchun otasining hovlisidan ulush ajratib berishlarini so`rasam bo`ladimi? Buning uchun qaerga murojaat qilinadi?
Ismi sir tutildi.
— Siz nazarda tutgan mulk, sobiq eringiz bilan birgalikdagi nikoh davrida orttirilgan bo`lsa, uning ikkidan bir qismiga egalikni so`rab, sudga murojaat qilishingiz mumkin. Ushbu uyda farzandingiz bilan uzoq muddat davomida yashamasdan turib, uy ro`yxatida saqlanib qolishligingiz, o`g`lingizga uyning ikkidan bir qismini ajratib olishlik uchun asos bo`lolmaydi.
«HADYa QILINGAN MULK BO`LINADIMI?»
— Yoshim 41 da. Turmushim bo`lmay, ajrashganman. Farzandim ham yo`q. Shu paytgacha ajrim masalasi qonuniy hal qilinmagandi. Ajrimga bersam, mol-mulk taqsimlanishi haqida o`ylab, ikkilanib turibman. Otam vafotidan oldin o`zi yashab turgan uyni menga hadya qilib bergan. Ajrim vaqti mana shu uyning yarmi erimning nomiga o`tib ketmaydimi? Axir mol-mulk teng bo`linadi-ku.
Ismi sir tutildi.
— Er-xotin o`rtasida birgalikda orttirilgan mulkni bo`lish nizolari ko`tarilgan vaqtda nikoh davrida yoki xotinga hadya qilingan mulk hadya qilingan shaxsning mutlaq mulki hisoblanib, er-xotin o`rtasida bo`linmaydi.
