— Ukam shartnoma asosida tahsil oladi. Shartnoma pulini men to`layman. Otam vafot etgani bois oilaning moddiy ta`minoti mening zimmamda. Eshitishimcha, shartnoma pulini to`layotganlar daromad solig`idan ozod bo`lar ekan. Shunga aniqlik kiritsangiz. To`langan shartnoma pulidan daromad solig`ini qaytarib olsam bo`ladimi?
Nodir Fayziev, Samarqand shahri
Murojaatga Davlat soliq qo`mitasi axborot xizmati boshlig`i Muzaffar YuSUF NAZAROV javob beradilar.
— O`zbekiston Respublikasi Soliq kodeksining 179-moddasida jismoniy shaxslarning soliq solinmaydigan daromadlari tarkibi ko`rsatilgan. Soliq kodeksining 179-moddasiga asosan Jismoniy shaxslarning quyidagi daromadlariga soliq solinmaydi: - Ushbu moddaning 31-bandiga asosan fuqarolarning soliq solinadigan ish haqi va boshqa daromadlarining: O`zbekiston Respublikasi oliy o`quv yurtlarida ta`lim olish uchun (o`zining o`qishi yoki yigirma olti yoshga to`lmagan farzandlarining o`qishi uchun) yo`naltiriladigan summalari daromad solig`idan ozod qilinishi ko`rsatilgan. Shu sababli ukangizning o`qishi uchun to`langan pulingiz daromad solig`idan ozod qilinmaydi.
