​Pardoz vositalari allergiyaga sababmi?

Kosmetik vositalar hech mubolag`asiz hayotimizning bir qismiga aylanib ulgurdi. Juda bo`lmaganda antiperspirant yoki atirlardan kuniga bir marta foydalanamiz. Biroq ular allergiyaga sabab bo`lsa-chi? Vositadan voz kechish shartmi yo boshqa chorasi bormi? Shu savollar bilan dermatolog Nodira AKROMOVAga yuzlandik.

Belgilari qanday?

Agar pardozni yakunlagach qichishish, achishish, qizarish, ko`z ostida ko`kimtir dog`larni sezsangiz, shish va qopchalar paydo bo`lsa, ko`z o`z-o`zidan yoshlanib, husnbuzar yoki toshma tosha boshlasa, labingiz qurqulashib ketsa bilingki, atir-upangiz allergik reaksiyani yuzaga keltirdi. Bunday hollarda darhol yuzni iliq suv bilan yuvib, tabiiy moylardan biri bilan tozalash mumkin. Ko`zlarni esa choy yoki moychechak damlamasida chaygan afzal.

«Dushman»larni tanib olamiz

Pardoz vositalari tarkibidagi allergiya chaqiruvchi «dushman»larimiz asosan uchga bo`lingan:

1. Konservantlar. Ular har qanday atir-upa tarkibida bo`ladi. Ko`pincha miqdori ahamiyatga ega. Uni aniqlash uchun esa vositangizning yaroqlilik muddatiga e`tibor qarating. Muddat qancha uzoq bo`lsa, tarkibidagi konservantlar shuncha ko`p degani. Shuning uchun xarid chog`ida yaroqlilik muddati kam vositalarga e`tibor qarating.

2. Iforlar. Pardoz vositasi qanchalik o`tkir ifor taratsa, demak tarkibida aromatizatorlar shuncha ko`p. Nafas yo`llari orqali tanaga tushgan qo`zg`atuvchilar esa boshqalariga qaraganda xavfliroq sanaladi. Ba`zi hollarda tabiiy iforlar yoki efir moylari sun`iylaridan ko`ra ko`proq xavf tug`dirishi mumkin. Masalan, bergamot yoki sitrus mevalarning efir moylari allergiyaga moyillikni oshiradi. Shuning uchun xarid chog`ida vositaning iforiga uchmang.

3. Bo`yoqlar. Lab bo`yog`i tarkibidagi analin rang beruvchisi, qosh va ko`z qalamlaridagi xrom, kumush, nikel metall tuzlar xastalikning qo`zg`atuvchilari hisoblanadi. Albatta, bu moddalarni boshqa kosmetik vositalar tarkibida ham uchratish mumkin. Biroq aynan lab va ko`z orqali organizmga tushish ehtimoli yuqori. Yodda saqlang, pardoz vositasi qanchalik yorqin, saqlanish muddati uzoq bo`lsa, agressiv qo`zg`atuvchilar shuncha ko`p bo`ladi.

Sinalgan vosita pand bersa-chi?

Qaysi vosita xavfliroq?

Agar qanday turdagi pardoz vositalari allergik reaksiyani keltirib chiqarishini jadval qiladigan bo`lsak, uning birinchi qatorini suvga chidamli tush egallaydi. Keyingi qatorlardan uzoq muddat saqlanib turadigan lab bo`yog`i, tana va yuz uchun mo`ljallangan kremlar, sovun va dush uchun gel egallaydi. Shampun ham jadvalning oldi pog`onalarida turadi. Shellak manikyuri ham ko`pgina go`zallarni noqulay ahvolga solib qo`ymoqda. Xo`sh nima qilish kerak? Axir pardoz-andozdan voz keching deyish, umuman ko`chaga chiqmang deyish bilan barobar-ku? Yaxshisi rastalardan «gipoallergen» yozuvli vositalarni izlang. To`g`ri ular noxushlikdan yuz foiz himoyalaydi deya olmaymiz. Іech bo`lmaganda minglab ko`ngillilarda sinalib, tekshirilib, keyin ishlab chiqarilaganini bilasiz. Bu esa ishonch uyg`otadi.

Qolaversa, allergiya yuzaga keltirdi degani, doim ham vositaning sifatsiz ekanidan darak beravermaydi. Shunchaki, tanangiz undagi qaysidir moddani qabul qilmayapti. O`sha modda qaysiligini dermatolog-shifokor bilan birgalikda aniqlab, o`zingizga mos kosmetikani tanlasangiz muammongiz oson hal bo`ladi.

MAFTUNA tayyorladi.