Бугун АОКА мажлислар залида шов-шувларга сабаб бўлган “Ўзбекистонда кунига 5600 сўм ишлаб топган одам камбағал эмас” мавзуси доирасида ташкил этилган матбуот анжуманида Иқтисодий тадқиқотлар ва ислоҳотлар маркази директори Обид Ҳакимов 3,2 АҚШ доллари қандай қилиб 5600 сўмга "тенглаштирилгани" ҳақида ҳам тушунтириш берди.
“3,2 доллар қандай қилиб 5600 сўмга ўтказилди деган гапга келадиган бўлсак, ўша ерда тўлов қобилияти паритети бўйича деб аниқ қилиб айтдик. Тўлов қобилияти паритети бўйича 3,2 доллар қийматдаги маҳсулотлар, масалан АҚШда бу қийматга нима маҳсулотлар сотиб ололасиз, шу пулнинг қанча кучи бор? Ушбу маҳсулотларни Ўзбекистонда қанчага олса бўлади? Мана шу паритет коэффициенти бўйича ҳисобланади. У номинал бўйича ҳисобланмайди.Масалан, Америкада бир дона нонни 2 долларга оладиган бўлсангиз, Ўзбекистонда бир дона нон 20 цент бўлади. Ўн баробар фарқи бор. Бу коэффициент битта нон, бензин ёки бошқа нарсага эмас, бир нечта, мингдан ортиқ маҳсулотлар орқали ҳисоблаб чиқилади.
Бундан ташқари, 2020 йилда ҳам Жаҳон банки билан биргаликда 2011 йилдан бери тўлов қобилияти паритети бўйича бўлган суммани ҳисоблаб чиққанимизда ҳам бу сумма чиққан. 5600 сўм деганим, бу сумма айрим коэффициентлар бўйича 6-6,5 минг атрофида туради. Унчалик ҳам катта фарқ қилмайди.
Камбағалликни ўлчаш деганда камбағилликни тарифига қараб ўлчови ҳам ўзгаради. Қандай тариф бўлса ўлчови ўзгаради. Айтайлик камбағаллик 5% бўладиган бўлса, бошқа тарифга нисбатан камбағаллик 10% бўлиши мумкин. Бу қайсидир мамлакатнинг иқтисодий ҳолатидан, ижтимоий-иқтисодий одатидан келиб чиқиб ҳар хил ўлчовлар бўлади.
Бир нарсани айтиб ўтишим керак: бу глобал камбағаллик кўрсаткичи. Буни Ўзбекистонда амал қилади, деб ҳеч ким айтгани йўқ, ҳеч ким айтмайди ҳам. Шунинг учун бизнинг асосий мақсадимиз – Ўзбекистондаги миллий камбағаллик чегарасини ишлаб чиқиш. Уни ишлаб чиқиш учун ҳозир тадқиқотлар олиб борилмоқда. Кеча айтилган нарса Ўзбекистонда шундай экан, деган нарса эмас. Бу камбағалликни ўлчаш бўйича ўлчов сифатида айтилди”, - дея Обид Ҳакимов кенг муҳокамаларга сабаб бўлган фикрларига изоҳ берди.
