Бугун 6-ноябрь куни Туризмни ривожлантириш давлат қўмитаси томонидан ташкил этилган "Энг яхши AГТКС, AГҚС ва AЙҚС санитария-гигиена шоҳобчаси" танлови ғолибларини тақдирлаш маросими бўлиб ўтди. Унда сўзга чиққан Туризмни ривожлантириш давлат қўмитаси раиси ўринбосари Фахриддин Давруков юртимиздаги “Ҳожатхоналар инқилоби” ҳақида гапирди.
“ҲОЖАТХОНАЛАР ИНҚИЛОБИ”
— Бугунги кунда юртимизда туризм соҳасини янада ривожлантиришга ва туризмнинг ҳудудлар ялпи ички маҳсулотидаги улушини оширишга устувор масала сифатида эътибор қаратилмоқда. Туризм соҳаси жозибадорлигини оширишда, туристик инфратузилманинг асосий таркибий қисмларидан бири бўлган замонавий санитария-гигиена шохобчалари, яъни ҳожатхоналар билан таъминлаш масаласи долзарб аҳамиятга эга. Бу борада иш бошлаган илк йилларимизда ҳудудларда замонавий ҳожатхоналар етишмаслиги, мавжудларининг ҳолати ҳам талабга жавоб бермаслиги маҳаллий ва чет эллик туристлар томонидан кўплаб шикоятларга сабаб бўлаётган эди. Ушбу муаммони имкон қадар қисқа муддатда ҳал қилиш учун 2017 йилдан мамлакатимиз раҳбарияти томонидан қўллаб-қувватланган “Ҳожатхоналар инқилоби”ни бошладик.
“ҚАРИЙИБ 2 МИНГТАСИ ЯНГИДАН ҚУРИЛДИ”
— Ўтган қисқа давр мобайнида Қўмита ташаббуси, маҳаллий ҳокимликлар, мутасадди вазирлик ва идоралар билан ҳамкорликда олиб борилаётган амалий сайьи-ҳаракатлар натижасида ҳудудлардаги хожатхоналар борасидаги вазият бирмунча яхшилангани кўзга ташланмоқда. Буни ҳаттоки чет эллик туристлар ҳам эътироф этаётганлиги мамнуният бағишлайди. Биргина 2017-2020 йиллар мобайнида республикадаги мавжуд ҳожатхоналарнинг аксар қисми ҳозирги замон талаблари асосида қайта таъмирланган бўлса, хўжалик юритувчи субектлар томонидан ҳудудларда қарийиб 2 мингтаси янгидан қурилди. Шунингдек, тадбиркорлик субъектларига намуна сифатида кўрсатиш учун Қўмита маблағлари ҳисобидан республикамизнинг деярли барча ҳудудларида 2-3 тадан, жами 30 га яқин намунавий санитария-гигиена шохобчаси қурилди. Амалга оширилган ишлар билан биргаликда бу борада ҳал қилиниши лозим бўлган камчиликлар ҳам етарли эди, яъни республика бўйича мавжуд 4 мингдан ортиқ автомобилларга ёқилғи қуйиш станцияларининг 800 тасида ёки атиги 20 фоизида замонавий хожатхона мавжуд эди. Мазкур салбий ҳолатларнинг олдини олиш мақсадида Ҳукуматнинг 2019 йил 21 сентябрдаги 793-сонли қарори билан, барча автомобилларга ёқилғи қуйиш масканларидаги мавжуд санитария-гигиена шохобчаларини 2020 йилнинг 1 мартига қадар санитария-гигиена, архитектура-қурилиш қоида ва меъёрларига мослаштириш, мавжуд бўлмаганларида эса қурилиш ишларини амалга ошириши белгиланди. Коронавирус пандемияси ва мавжуд эпидемиологик вазиятдан келиб чиққан ҳолда, Ҳукуматнинг 2020 йил 10 июлдаги 433-сон қарори билан, мазкур муддатни 2020 йилнинг 1 сентябрига қадар узайтирдик.
ЭНДИ АЁҚШЛАРДА WI-FI ЗОНАЛАРИ ҲАМ БЎЛАДИ
— Қарорга мувофиқ, ёқилғи қуйиш станциялари ҳудудида замонавий санитария-гигиена шохобчалари мавжуд бўлиши талаби билан бирга уларга бир қатор қулайликлар ҳам яратиш кўзда тутилган, яъни барча турдаги автомобилларга ёқилғи қуйиш масканлари эгаларига ўз ҳудудида асосий фаолият туридан ташқари аҳолига савдо ва маиший хизмат кўрсатиш, тез овқатланиш масканлари барпо этиш, wi-fi зоналарини ташкил қилиш орқали фойдаланувчилар оқимини кенгайтириш имкониятлари ҳам кўзда тутилган.
МУАММОЛАР ҲАМ ЙЎҚ ЭМАС
— Қўмита ташаббусига кўра, Ҳудудий ишчи гуруҳлар томонидан 2020 йилнинг 2-20 сентябрь кунлари амалга оширилган такрорий хатлов якунларига бўйича республикадаги барча автомобилларга ёқилғи қуйиш станцияларининг замонавий санитария-гигиена шохобчалари билан таъминланиш кўрсаткичи 20 фоиздан қарйиб 70 фоизга кўтарилишига эришилди. Бироқ, белгиланган муддат ва имкониятларга қарамай, республика бўйича 1,1 мингга яқин ёқилғи қуйиш станциясининг санитария-гигиена шохобчаси талабга жавоб бермаслиги ёки қурилиш ишларининг якунланмаганлиги, 271 тасида эса шу кунгача ҳам умумфойдаланишдаги санитария-гигиена шохобчаси мавжуд эмаслиги аниқланган. Ҳукумат раҳбарининг қатъий талаблари асосида Қарор ижросини жойларга чиққан ҳолда танқидий ўрганиш, ҳудудларга, тадбиркорлик субъектларига амалий ва услубий ёрдам кўрсатиш мақсадида йил якунига қадар барча ҳудудларга Республика ишчи гуруҳи ташрифлари режалаштирилган бўлиб, ўрганишлар Тошкент шаҳри ва вилоятида бошланди. Мазкур ҳафтада (3-5 ноябрь кунлари) амалга оширилган ўрганишлар давомида Республика ва ҳудудий ишчи гуруҳ аъзолари Тошкент шаҳри ва Тошкент вилоятидаги 30 га яқин ёқилғи қуйиш станциясига бевосита ташриф буюрилди ҳамда уларнинг 17 тасида (Тошкент шаҳрида 9 та, Тошкент вилоятида 8 та) қарор талаблари бажарилмаганлиги учун фаолиятини қисқа муддатга тўхтатиш чоралари кўрилган. Бошқа ёқилғи қуйиш шохобчаларига ҳам ушбу тақдирланаётган ёқилғи қуйиш шохобчаларидан ўрнак олган ҳолда аҳолига қўшимча хизматлар турларини янада кўпайтириш орқали ўз даромадларини янада оширишларини тавсия қиламан. Келгуси йилларда ҳам бундай намунали ёқилғи қуйиш шохобчаларини рағбатлантириш ишлари давом эттирилиши ҳамда мукофот жамғармаси миқдорини ҳам оширилишини маълум қилган ҳолда барчангизга амалга ошираётган ишларингизда улкан зафарлар тилаб қоламан.
