Кино санъати ҳар бир халқнинг урф-одатларини очиб бериши билан бир қаторда ўша мамлакатнинг рейтингини ҳам белгилаб беради. Аввал хабар берганимиздек, Ўзбекистон маданий мероси ҳафталигининг учинчи куни кино ва фотография тарихига бағишланади.
17 декабрь куни тадбирлари доирасида Ўрта Осиё киношуносларининг секция йиғилиши бўлиб ўтади.
Бундан ташқари, Ўзбекистон кинематографияси тарихида катта аҳамиятга эга бўлган муҳим тадбир ўтказилади. Хусусан Россия фильмофондида сақланаётган мультипликацион кинотасмалар (100 дан ортиқ мультфильмлар) Ўзбекистонга қайтарилишига бағишланган тантанали тадбир бўлиб ўтади.
Шу жумладан, "олтин" кинофильмларимиз: «Маҳаллада дув-дув гап» (1960, режиссёр Шуҳрат Аббосов), «Алибобо ва 40 қароқчи» (1980, режиссёр Латиф Файзиев) – 2 қисм, «Ленинградликлар – жигарбандларим менинг» (1980, режиссёр Дамир Салимов), «Тоҳир ва Зуҳра» (1945, режиссёр Наби Ғаниев), «Аччиқ данак» (1975, режиссёр Қамара Камолова), «Келинлар қўзғолони» (1985, режиссёр Мелис Абзалов) бадиий фильмлари рақамлаштирилган форматда юртимиз кино фондига қайтариб берилади. Буларнинг барчаси муҳим лойиҳа доирасида маданий меросимизни халқимизга қайтариш йўлида олиб борилган саъй-ҳаракатлар натижасидир.
Ҳафталикнинг айнан кинога бағишланган кунида илк бор катта экранда Ёлқин Тўйчиевнинг «Москва премьераси» халқаро кинофестивалида Гран-при совринига муваффақ бўлган ҳамда «Оскар» жаҳон кино совринига тавсия этилган «Фариданинг икки минг қўшиғи» фильми намойиш этилади. Ушбу картинага хориждан келган меҳмонларга тушунарли бўлиши учун инглиз тилида субтитрлар ҳам ҳавола қилинган.
Шу қаторда, маданий мерос ҳафталигининг иштирокчилари ва меҳмонлари миллий кинематографиянинг пайдо бўлган кунидан бошлаб, ҳозирги кунгача ривожланиш жараёни ҳақидаги нодир тарихий кадрларини томоша қилишади.
