28 январь куни “Ўзбекистон Республикасининг Коррупцияга қарши курашиш бўйича 2021-2025 йилларга мўлжалланган миллий стратегияси лойиҳаси муҳокамасига бағишланган Миллий маслаҳатлашув йиғилиши” бўлиб ўтди. Бу ҳақда Ўзбекистон Республикаси Олий Мажлиси Сенатининг Ахборот хизмати маълум қилди.
Тадбирда Ўзбекистон Республикаси Олий Мажлиси Сенати Раиси, Коррупцияга қарши курашиш миллий кенгаши раиси Танзила Нарбаева кириш сўзи билан қатнашди.
Шунингдек, БМТ Тараккиёт дастурининг Ўзбекистондаги доимий вакили М. Димовска, Олий Мажлис палаталари, вазирлик ва идоралар, нодавлат нотижорат ташкилотлари, оммавий ахборот воситалари вакиллари иштирок этди.
Сўнгги йилларда коррупцияга қарши курашиш давлат сиёсати даражасига кўтарилди. Жумладан, мамлакат ва жамият қурилишининг барча соҳаларида коррупциоген омилларга чек қўйишга қаратилган 70 дан ортиқ норматив-ҳуқуқий ҳужжатлар қабул қилинди. “Коррупциясиз соҳа” лойиҳалари, “Йўл хариталари” ва дастурлар тасдиқланди ҳамда қатор нодавлат нотижорат ташкилотлари билан амалий ҳамкорлик йўлга қўйилди.
Бу борада Коррупцияга қарши курашиш миллий кенгаши ва Коррупцияга қарши курашиш агентлиги самарали ишларни амалга ошириб келмоқда.
Шундай ишларнинг давоми сифатида, коррупциянинг олдини олиш ва унга қарши курашиш бўйича давлатимизнинг яқин ва ўрта истиқболдаги асосий устувор вазифаларини йўналтиришга қаратилган яна бир муҳим ҳужжат – Коррупцияга қарши курашиш бўйича 2021-2025 йилларга мўлжалланган миллий стратегиянинг лойиҳаси ишлаб чиқилди. У келгуси беш йилликдаги коррупциянинг олдини олиш ва унга қарши курашиш соҳасидаги асосий устувор вазифаларни белгилаб берувчи, бу борадаги ҳаракатларни бирлаштирувчи ва мувофиқлаштирувчи ҳужжат ҳисобланади.
Миллий стратегия лойиҳасида мамлакатнинг коррупцияга қарши курашиш соҳасидаги жорий ҳолати, камчиликлар, давлат сиёсатининг келгусидаги асосий йўналишлари акс эттирилиши кўзда тутилган. Шунингдек, ушбу вазифаларни бажарилишини мониторинг қилиш ва молиялаштириш механизмини белгилаш ҳамда амалга оширилган ишлардан кутилаётган натижалар ўрин олиши режалаштирилган.
Тадбирда мазкур лойиҳа юзасидан Олий Мажлис Сенати Суд-ҳуқуқ масалалари ва коррупцияга қарши курашиш қўмитаси раиси Н. Умаров сўзга чиқиб, стратегияни амалга ошириш натижасида миллий қонунчилигимиз такомиллаштирилиши, мамлакатда коррупциянинг олдини олишга қаратилган ташкилий-ҳуқуқий тизим яратилиши, парламент ва жамоатчиликнинг самарали назорати таъминланиши, аҳолининг ҳуқуқий онги ва маданияти юксалтирилиши ҳамда мамлакатнинг бу соҳадаги халқаро рейтинглар ва индекслар бўйича кўрсаткичлари янада яхшиланишини қайд этди.
Иштирокчилар томонидан ҳуқуқий бўшлиқларни бартараф этиш, давлат хизмати тизимининг норматив асосларини такомиллаштириш, суд ҳокимиятининг мустақиллигини янада мустаҳкамлаш, даромадларни декларация қилиш тизимини босқичма-босқич жорий этиш, давлат харидларининг самарали ҳуқуқий механизмларини яратиш, фуқаролик жамияти институтлари, ОАВ фаолиятининг чинакам эркинлигини таъминлаш бўйича тегишли таклифлар билдирилди.
Йиғилиш якунида билдирилган таклифлар асосида Миллий стратегиянинг дастлабки лойиҳаси такомиллаштириладиган бўлди.
