Нодавлат Электрон Оммавий Ахборот воситалари Миллий ассоциациясининг “Naesmi Media Hall”ида “Янги Ўзбекистон – янги сайловлар ” мавзусида ўтказилган очиқ мулоқотда юртимиздаги сайлов жараёнларини кузатишга ташриф буюрган чет эллик меҳмонлар ҳам иштирок этди.Улар орасида Белоруссия давлат университетининг халқаро алоқалар факультети декани, тарих фанлари доктори, профессор Виктор Шадурский ҳам бор эди. “Даракчи” мухбири тарихчи олим билан суҳбатда унинг мамлакат ички ва ташқи сиёсати, янгиланган Ўзбекистонда ўтказиладиган сиёсий жараёнлар ҳақидаги фикрлари билан қизиқди.
–Биз мамлакатингизда охирги йиллардаги ички ва ташқи сиёсатдаги ислоҳотларни жуда катта қизиқиш билан кузатиб боряпмиз. Албатта, тушунамизки, бу ишларнинг самарасига эришиш учун Ўзбекистонга кучли ва самарали парламент ҳукумати, барча масалаларга оқилона ечим топа оладиган малакали профессионаллар керак.
Бу ерга келиб, кўпгина академиклар, жамоатчилик вакиллари, шу жумладан Ўзбекистон Миллий университети олимлари билан учрашдик. Юртдошларингизнинг қалбида кўтаринки руҳ, келажакка умидворликни кўрдик. Албатта, бўлаётган ўзгаришлар келажакда муваффақиятга элтади.
Айни пайтда Ўзбекистон ҳукумати олдида демократик ислоҳотларни жорий қилиш ва шу вақтнинг ўзида радикал плюрализмнинг олдини олиш вазифаси турибди. Радикал плюрализм шундай ҳолатки, унда жамиятни бошқариш жуда қийин бўлади. Бироқ биз ишонамиз, Ўзбекистон ўз олдига қўйган мақсад ва вазифаларини, албатта, уддалайди, ислоҳотлар ўз самарасини намоён қилади.
–Мамлакатнинг ташқи сиёсатини қандай баҳолайсиз?
–Яқинда бўлиб ўтган Марказий Осиё давлатларининг раҳбарлари иштирокидаги саммитда қабул қилинган қарорлар барчада қизиқиш уйғотди ва жуда катта аҳамият касб этди. Чунки Ўзбекистон президенти бу саммитда бундан буёғига қандай яшаймиз, мавжуд масалаларни биргаликда қандай ҳал қиламиз, деган аниқ, лўнда саволларни ўртага ташлади. Айниқса транспорт йўлаклари, ҳамкорликдаги транспорт сиёсатини ривожлантириш борасидаги таклифлари бизга маъқул бўлди. Мамлакатларимизнинг ўхшаш жиҳати шуки – Ўзбекистон ҳам Блоруссия каби денгиз йўлига эга бўлмаган мамлакат. Биз ўз маҳсулотимизни сотишимиз учун, нафақат сотиш, балки ҳамкорликда маҳсулот ишлаб чиқаришимиз учун ҳам янги савдо йўлларини излаб топишимиз керак. Айта оламанки, Ўзбекистоннинг қўшни давлатлар билан борди-келди, олди-сотди муносабатлари, ўзаро қўшма ҳамкорликдаги транспорт алоқалари кўп борада бизга ҳам ибрат бўлиши мумкин.
–Ўзбекистонга аввал келганмисиз? Сайловларни кузатиб борганмисиз?
– Бундан бир ой олдин халқаро конференцияга келгандим. Мана, яна бир бор мамлакатингизда бўлиш имкониятига эга бўлдим. Ўзбекистондаги сайловларда олдин иштирок этмаганман. Аммо интернетдан ҳар доим Ўзбекистондаги сиёсий жараёнларни кузатиб бораман. Сайлов кодексига киритилган ўзгаришлар билан танишдим. Албатта, улар фуқароларга қўшимча имкониятларни очади. Бироқ сайловларда асосийси шуки, Ўзбекистон келгусида қандай бўлиши, парламент қандай бўлиши мамлакатнинг ичкарисида ҳал этилади, унинг ташқарисида эмас. Мана шу энг муҳим ҳақиқат!
Шунинг учун умид қиламизки, ҳаммаси яхши бўлади, ташкилий ишлар ҳам, демократия ҳам, сиз ҳақиқий парламентни қўлга киритасиз. У барча мураккаб масалаларни ҳал қилади. Биз эса сайлов жараёнларини кузатиб, сизлардан ўзига хос тажриба ўрганиб кетамиз.
Манзура Бекжонова суҳбатлашди.
