Аввал хабар берганимиздек, бугун, 25 декабрда Ўзбекистон Республикаси Бош прокуратурасида Соғлиқни сақлаш вазирлиги тизимида коррупция ҳолатлари ҳамда уларни келтириб чиқараётган шарт-шароитларни муҳокама қилишга бағишланган Корруацияга қарши курашиш бўйича республика идоралараро комиссиясининг йиғилиши бўлиб ўтди...
Йиғилишда репродуктив саломатликни, оналик ва болаликни муҳофаза қилишда ҳам коррупция илдиз отиб, бу иллат ҳомиладор аёлни рўйхатга олишдан бошлаб, фарзанд туғилиб, уни оёққа қўйгунгача кўрсатиладиган барча тиббий хизмат жараёнларини кенг қамраб олганига ҳам урғу берилди.
“ГЕМАТОЛОГИЯ ВА ҚОН ҚУЙИШ ИЛМИЙ ТЕКШИРИШ ИНСТИТУТИДА БЕМОРЛАР 3 КУНДАН 6 КУНГАЧА НАВБАТ КУТИШГА МАЖБУР БЎЛМОҚДА”
НиғматуллаЙЎЛДОШЕВ, Ўзбекистон Республикаси Бош прокурори:
— Репродуктив саломатликни, оналик ва болаликни муҳофаза қилиш – давлат сиёсати даражасига кўтарилгани соҳа мутасаддиларига алоҳида масъулият юклайди.
Афсуски, ушбу йўналишларда ҳам коррупция “палак” отган. Бу соҳада фаолият олиб бораётган 69 нафар тиббиёт ходими тамагирлик ва бошқа суистеъмолчиликлари учун жиноий жавобгарликка тортилганлиги шундан далолат беради.
Бектемир туман марказий поликлиникаси шифокори ҳомиладор И.ни диспансер рўйхатига киритиш учун 150 минг сўм,Р.ни диспансер назоратига олиш эвазига 350 минг сўм олганлиги учун жавобгарликка тортилди.
Самарқанд вилояти Перинатал маркази шифокори фуқаро Ш.ни жарроҳлик йўли билан туғдириш эвазига 500 минг сўм талаб қилиб олганда ушланди.
Тошкент шаҳар 4-сонли туғруқхона шифокори эса,300 доллар пора эвазига фуқаро Х.нинг 14 ҳафталик ҳомиласини аборт қилиш йўли билан олиб ташлади.
Яна бир хавфли касаллик– оқ қон ва қон тизими касалликларини диагностика қилиш ҳамда даволаш соҳасида ҳам қатор муаммолар мавжуд.
Сўнгги 4 йилда гематологик касалликка чалинган беморлар сони республикада 10 фоизга ортган бўлсада, бу йўналишдаги шифокор штатлари ва бемор ўринларини кўпайтириш чоралари кўрилмаган.
Бундай беморлар учун ордерлар сони ҳам чекланган бўлиб, Самарқанд, Наманган ва Навоий вилоятларидан ташқари барча ҳудудларда ўринлар пуллик бўлиб, бепул даволаниш имконияти мавжуд эмас.
Республикада ягона бўлган – Гематология ва қон қуйиш илмий текшириш институтига бепул даволаниш учун бир ойда 323 та ордер берилсада,амалда 544 нафар бемор қабул қилинмоқда ва ўринлар етишмаслиги туфайли беморлар 3 кундан 6 кунгача навбат кутишга мажбур бўлмоқда.
Институт поликлиникаси бир йилда 40 минг нафар беморни қабул қилишга ихтисослашган бўлсада, 2018 йилда 68.152 нафар(шундан 30.704 нафари болалар) ёки қувватига нисбатан 70 фоизга кўп бемор қабул қилинган.
Бу эса, ўз навбатида, даволаш ишлари сифатига салбий таъсир кўрсатиб, ўринлар камлиги туфайли беморларнинг шифохонага кеч келтирилиши оқибатида сўнгги тўрт йилда 63 та суткалик ўлим ҳолатларига сабаб бўлган.
Эътибор беринг! Йилдан-йилгааҳоли ва қон касалликларига чалинганлар сони ортиб бораётган бир пайтда, гематология соҳасидаги штат нормативлари ҳанузгача вазирликнинг маънан эскирган ва бугунги талабларга жавоб бермайдиган,1995 йилги 354-сонли буйруғига асосан тартибга солинмоқда.
Институт клиникаcининг цитостатикдори воситалари билан таъминланиш даражаси пастлиги (40%) оқибатида бу касалликлардан тузалиш кўрсаткичи ўртача 40- 50 фоизни ташкил қилаётганлиги ўта ташвишлидир.
Ваҳоланки, бу касалликлардан тузалиш кўрсаткичи ривожланган давлатларда 70 – 80 фоизни ташкил этади.
