“Даракчи” таҳририятига қадди фарзанд доғидан дол эгилган муштипар она кириб келди. Кўзларида умид сўнган, юрак хасрати эса дунёларга тенг чорасиз аёл.
Эргашева Хайринисо деб ўзини таништирган аёл, 4 йилдирки, Ўзбекистон бўйлаб ҳақиқат излаб, кирмаган ҳуқуқ-тартибот идораси, мурожаат қилмаган масъул раҳбар қолмаганини маълум қилди. Хўш, у қайси ноҳақлик учун, қандай ҳақиқатни талаб қилмоқда. Онанинг сўзларига қулоқ тутдик.
“2016 йил 4 июнь куни ўғлим Зоиров Рашиджон машинаси билан кўчага чиқиб кетганди. Соат 10:00ларда телефон орқали гаплашдик. Мени бозорга олиб бориб келишини сўраганимда, ўртоғи Мамиров Акбарнинг уйида ҳашарда эканлигини айтиб, ўзим бориб келишинимни илтимос қилди. Бозорга бориб келдим, овқат қилдим, намозимни ўқиб, уйда дам олиб ётгандим. Бироз кўзим илинган экан, деразамни кимдир тақиллатди. Қўшним Эгам ака экан. Тинчликми? деб сўрадим, Ўғлингни юраги сиқиб қолибди, тез шифохонага бораркансан деди. Хайрон бўлиб қолдим: ўғлим хечам касал эмасди, соппа-соғ бола, нега юраги сиқиб қолади. Шошиб, жонлантириш бўлимига бордим, бироқ хамширалар мени “моркхона” томонга бошлашди. Нега, нима учун? Ҳайратда эдим. Ўша ерда ўртоғи Мамиров Акбар ота-онаси билан турган экан. Уларга қараб, нима бўлганини сўрадим. Ўғлинг сувда оёғини томири тортиб, сувдан чиқолмай ўлиб қолибди дейишди. Қанақа сув, қаерда, ахир сизларникида ҳашарда эдику дедим. Шу пайт орқамда экспертизадан одам келиб, ўғлингиз 5 метр сувга чўкиб ўлган деди. Шу жавобдан кейин мени қон босимим ошиб кетиб, мазам қочиб қолди. Мени уйга олиб кетишди. Шундан сўнг менсиз боламни тиббий экспертиза қилишган, тўкилиб кетган тишларини беркитиш учун оғзини пахта билан тўлдириб қўйишган. Кейин бориб кўрганимда оғзидан пахтани олсам, тишлари тўкилиб кетяпти, елкасида таёқнинг изи бор, юзлари қорайиб кетган, шунингдек, қовурғаси синган. Сувга қандай аҳволда ташлаб юборилган бўлса ҳам, ўғлим шу қадар сувдан чиқишга ҳаракат қилганки, ҳатто ер тимдалаверганидан тирноқларининг ичи балчиққа тўлиб кетган. Акамдан нега бундай аҳволи деб сўрадим. Акам, ўғлинг яхшигина таёқ еган, мана ичини очиб экспертиза қилишибди, ҳали ҳақиқат маълум бўлади энди, деб мени юпатганди. Бироқ, ундай бўлмади. Жамики далиллар, ҳолатларга кўз юмилиб, 83-модда — бахтсиз воқеа деб ёпилди. Болам қабрга қўйилгандан сўнг 4 ой ўтиб эксгумация қилиш учун очилди. Биз кўриб ҳайратда қолдик, тупроқда боламдан асар ҳам қолмаган, суягини ўзи турибди. Акам ҳечам бунақа бўлиши мумкинмас, деб хайрон бўлди. Улар жиноятни ёпиш учун, хатто боламнинг ўлигини ҳам дорилаб, чириб кетадиган қилишган. Бормаган тегишли органим, кирмаган эшигим қолмади. ” — дея, йиғлайди 22 ёшли бўй фарзандидан айрилган онаизор.
Маълум қилинишича, ўша куни марҳум Рашиджоннинг ўлдирилишида иштирок этган йигитлар сони 8 нафар бўлган. Хашарда ишлаш давомида Рашид ўз кийимларини ечиб қўйиб, уй эгаси, ўртоғи Акбарнинг кийими билан ишлаган. Бироқ тергов жараёнида унинг ечиб куйган кийими инобатга олиниб, кийимда жиноят аломатлари йўқ, деб ёпилган. Марҳумнинг онаси ва опаси Акбарнинг синглисидан “ўғлим акангнинг қаси кийимини кийганди” деб сўраганида, қиз ҳаммасини айтиб берган. Шунингдек, 5 метр чуқурлик дейилган жойга бориб ўлчанганда бир ярим метр бўлиб чиққан. Хайринисо опа ушбу далиллар билан тергов ва экспертиза бўйича масъулларга юзланганда эса улар “биз буюрилган ишни қиляпмиз” дея бундан ортиқ тушунтириш бера олмаган. Онанинг қотиллик бўйича ўнлаб саволлари, яна ҳақиқатни очиш учун ўнлаб исботлари бор. Лекин уни эшитадиган, ҳақиқатни қарор топтирадиган мард топилмаяпти.
Биз онанинг ушбу савол ва исботлари билан мурожаатни назоратга олган ҳолда тегишли органлар билан қайта ўрганишга қарор қилдик.
Ўйлаймизки, ваҳшийлик қурбони бўлган фарзанди доғида 4 йилдан буён адойи-тамом бўлаётган онанинг дардларига, кўз ёшларига, энг муҳими адолат қарор топишига Масъул органлар беэътибор бўлмайди.
