Kuni kecha O`zbekiston Respublikasi Prezidenti saylovini xolis va haqqoniy yoritishni ta`minlashga munosib hissa qo`shish maqsadida tashkil etilgan Xalqaro media hollda "Aholining ijtimoiy muhofazasi: dolzarb masalalar" mavzusida davra suhbati bo`lib o`tdi.
Unda O`zbekiston Respublikasi Bosh vazirining o`rinbosari Behzod Musaev qator ijtimoiy sohalarga to`xtalar ekan, aholini koronavirusga qarshi ommaviy emlash masalalari to`g`risida ham fikr bildirib o`tdi.
"Joriy yilda vaksinasiya masalalariga alohida e`tibor qaratganimiz uchun koronavirusning bu yilgi to`lqini oldingi yilga qaraganda nisbatan engil kechdi. Hozirgi paytda vaksinasiya ishlarini amalga oshirish bo`yicha mamlakat bo`yicha 3600 ga yaqin punkt ishlab turibdi. Poliklinikalarga COVID-19ga qarshi ishlatiladigan barcha turdagi vaksinalar etkazib berilgan. Hozirga qadar emlash yoshidagi aholining 60 foizi emlandi. Yilning oxiriga qadar bu ko`rsatkichni 80% ga etkazish kutilmoqda", – dedi Bosh vazir o`rinbosari.
