“O`zbekneftgaz” AJ Boshqaruvi raisi Mehriddin Abdullaev Rossiyaning eng yirik universal banklaridan biri bo`lgan, Markaziy hamda Sharqiy Evropadagi banklar ro`yxatida xususiy kapitali bo`yicha etakchi o`rinni egallagan “Gazprombank” AJ Boshqaruvi raisi o`rinbosari Aleksey Matveev bilan uchrashdi va o`zaro ikkitomonlama hamkorlik masalalari muhokama qilindi.
Bugungi kunda “Gazprombank” AJ “O`zbekneftgaz” AJning uglevodorodlar qazib olish va qayta ishlashni oshirishga qaratilgan yirik investisiya loyihalarini moliyalashtirish sohasidagi strategik hamkori hisoblanadi.
Loyihalarni amalga oshirishda xorijiy kreditlar va investisiyalarni jalb qilmasdan qo`yilgan maqsadlarga erishishning imkonsiz. Bu yo`nalishda “O`zbekneftgaz” AJ ko`plab xalqaro moliya institutlari va investorlar qatori “Gazprombank” bilan ikki tomonlama manfaatli hamkorlikni yo`lga qo`ygan.
Xususan, “Gazprombank” AJ tomonidan so`nggi yillarda O`zbekiston Respublikasining neft-gaz sanoatida salmoqli loyihalarni amalga oshirish uchun 1,4 milliard AQSh dollaridan ortiq mablag` ajratildi.
Uchrashuvda “O`zbekneftgaz” AJ Boshqaruvi raisi “Gazprombank” vakillariga minnatdorchilik bildirib, ayni hamkorlarning bevosita qo`llab-quvvatlashi bilan “O`zbekneftgaz” AJ jahon reytingida yuqori pog`onalarga ko`tarilb borayotgani, nufuzli agentliklaridan korporativ reytinglarga ega bo`lgani hamda debyut evrobondlar ham chiqarilishga erishilganini qayd etdi.
“Gazprombank” AJ Boshqaruvi raisi o`rinbosari Aleksey Matveev ham “O`zbekneftgaz” AJ tomonidan erishilayotgan natijalardan xursand ekani va bu borada “Gazprombank” AJ doimo qo`llab-quvvatlashga tayyorligini, hamkorlik bu bilan cheklanib qolmay, yangi istiqbolli yo`nalishlarda davom ettirilishini ma`lum qildi.
Do`stona ruhda o`tgan uchrashuv doirasida tomonlar yangi loyihalarni amalga oshirish uchun “Gazprombank” AJ tomonidan beriladigan mablag`lar, asosiy shart-sharoitlarini muhokama qilib, keyingi hamkorlik rejalarini belgilab olishdi.