Sevimli

O`zbekistonning 8 shahrida“Yangi Nafas” ommaviy yugurish musobaqalari bo`lib o`tdi (video)

Sport 26.06.2022, 11:43
O`zbekistonning 8 shahrida“Yangi Nafas” ommaviy yugurish musobaqalari bo`lib o`tdi (video)

"Bir mamlakat, bir start, bir masofa, bir maqsad – birga yuguramiz!" shiori ostida ilk bor bir vaqtda O`zbekistonning 8 ta shahrida "Yangi Nafas" yugurish aksiyasi start oldi. Yoshlar kunini munosib nishonlash maqsadida tashkil etilgan ushbu tadbirda bugun maktab o`quvchilari va talabalar, jamoatchilik vakillari va tadbirkorlar, sportchilar va boshqa yugurish sporti ishqibozlari Toshkentda Chirchiqda, Gulistonda, Farg`onada, Namanganda, Jizzaxda, shuningdek Samarqand va Shahrisabzda 3 km masofaga yugurish borasida o`z kuchini sinab ko`rishdi.

“Yangi Nafas”yugurish musobaqasining tashkiliy ishlari borasida O`zbekiston engil atletika federasiyasi raisi Shuhrat Usmonov bilan suhbatlashdik.

—  Shuhrat Ismoilovich, Yangi Nafas loyihasining yaratilishi haqida gapirib bersangiz. 

— 2020 yilda, Covid-19 pandemiyasi paytida Federasiyamiz rahbariyati yangi virusga qarshi umumjamoa bo`lib kurashishga munosib hissa qo`shish hamda fuqarolar orasida yugurishni ommalashtirish maqsadida “Yangi Nafas” sport harakatini tashkillashtirish tashabbusi bilan chiqdi.

Ushbu sport yo`nalishidagi bilim va mahoratimiz aholi o`rtasida sog`lom turmush tarzini targ`ib qilish bo`yicha g`oya va tashabbuslarni qo`llab-quvvatlash hamda amalga oshirishda muhim manba bo`lib xizmat qildi. 2020 yilning o`zida O`zbekistonninng 19 ta shaharlarida ommaviy ijtimoiy yugurish musobaqalari tashkil etildi. Ularda 70 mingdan ortiq odam ishtirok etdi. 2021 yilda bo`lib o`tgan “YangiNafas”yugurish marafoniesa 100 mingdan ortiq fuqarolarni o`zida birlashtirdi.

— Bu yilgi “Yangi Nafas” yugurish musobaqalari qanday tartibda o`tkaziladi? 

— Federasiya bu yil yugurish bo`yicha ommaviy sport musobaqasini yangicha formatda tashkil qilishnirejalashtirdi.Ya`ni bir vaqtning o`zida yurtimizning 8 ta shaharlarida yugurish musobaqalariga start berildi.Ushbu yugurish marafonining ishtirokchilarining asosiy qismiyoshlar, Yoshlar ishlari agentligi tomonidan“YangiNafas” yugurish musobaqasi Yoshlar kuniga bag`ishlab tashkillashtirildi.Ushbu tashabbusni Sportni rivojlantirish vazirligi, Oliy va o`rta-maxsus ta`lim vazirligi, Adliya vazirligi, Milliy Olimpiya qo`mitasi, "O`zbekneftgaz" AJ qo`llab-quvvatladi. Ushbu loyihani amalga oshirishga qaratilgan yirik tashkiliy sa`y-harakatlarni Toshkent shahar hokimligi va boshqa ishtirokchi shaharlar hokimliklari o`z zimmasiga olishdi.

— O`zbekistonda "Yoshlar kuni"ni tantanali shinonlash yaqin yillar oralig`ida boshlangan. Bugungi kunda yosh avlod asosan nimalarga  qiziqadi? 

— Covid-19 pandemiyasi yoshlarning ongiga muayyan darajada ta`sir ko`rsatdi. Yosh avlod o`rtasida o`z-o`zini rivojlantirish va muvaffaqiyatga erishish tamoyillari sog`lom odat va ko`nikmalarni shakllantirish, o`zi va yaqinlarining salomatligi haqida qayg`urish, xalq jamiyat manfaatlari yo`lidagi ijtimoiy faollik bilan asoslanib bormoqda. Pandemiya avj olgan kunlarda hududlarimizdagi yoshlarning birdam, hamjihat bo`lib, aholiga yordam berishda faollik ko`rsatganini bir eslang. Ushbu g`ayrat-shijoatni susaytirmaslik kerak. Biz katta avlod sifatida jamiyatning uyg`un rivojlanishi va sog`lom turmush tarziga amal qilishga undovchi ekologik tafakkur shakllanishiga qulay sharoit yaratishimiz kerak. Shu maqsadda Yoshlar kuniga bag`ishlangan keng qamrovli “Yangi Nafas” yugurish musobaqasini tashkil etish va uni ijtimoiy hamkorlikda yuqori saviyada o`tkazishga harakat qildik. 

— Ushbu marafon qanday nazorat qilindi? Ya`ni turli shaharlarda bir vaqtda start olgan ommaviy yugurish jarayonlari qanday qilib tasvirga olindi?

— O`zbekiston Respublikasi Axborot texnologiyalari va kommunikasiyalarini rivojlantirish vazirligi ushbu tadbirga tayyorgarlik bo`yicha texnik masalalarda alohida mas`ullik ko`rsatdi. Barcha shaharlar orasida uzluksiz internet aloqa bo`lishini ta`inlab berdi. Bundan tashqari,mazkur ommaviy tadbirni yoritishda O`zbekiston Milliy teleradiokompaniyasi ham bevosita amaliy yordam ko`rsatdi. SportTV telekanalida hududiy muxbirlar ishtirokida musobaqa jarayonlaridan to`g`ridan-to`g`ri translyasiya olib berildi va bu tasvirlar onlayn tarzda efirga uzatildi. 

Toshkent shahridagi ishqibozlar Humo Arena sport majmuasidagi 8 ta ekran orqali 8 ta shaharda start berilgan "Yangi Nafas” yugurish musobaqasi jarayonlarini kuzatib borish imkoniyatiga ega bo`lishdi.

— Yugurish musobaqasida hakamlar hay`ati ishtiroki qanday tashkil etildi?

— Federasiya tomonidan maxsus guruh tashkil etilib, “Yangi Nafas” yugurish musobaqasi tashkil etilayotgan shaharlarga yuborildi. Mazkur sport bellashuvining asosiy masalalardan biri – hakamlar hay`ati tarkibini aniqlash edi. Buning uchun har bir shaharda sohaning tajribali mutaxassislari jalb etildi. Ushbu hakamlar World Athletics xalqaro ommaviy sport musobaqalarini tashkillashtirish assosiasiyasi talablariga ko`ra saralandi.

— “Yangi Nafas” yugurish musobaqasida kimlar qatnashdi? 

—  Bu marafonda ishtirok etish cheklanmagan, salomatligi bo`yicha sport bilan shug`ullanish va jismoniy harakatlarga jiddiy taqiq qo`yilmagan barcha fuqarolarga ishtirok etishga ruxsat berildi.

Musobaqada har bir ishtirokchiga imkon darajasida bo`lishi uchun o`rtacha masofa 3 km qilib belgilandi. Yugurish sport mashg`ulotlari bilan jiddiy shug`ullanuvchilar esa odatda 5, 10, 21, 42 km masofalarga yugurishadi. Yugurish trassasini barcha zaruriy talablarga muvofiq qilib tayyorlash hamda imkoniyati cheklangan ishtirokchilar uchun xavfsiz bo`lishiga alohida e`tibor berildi. O`ylaymanki, Federasiya tomonidan ushbu masofalarga yugurish ham bosqichma-bosqich ommalashtirib boriladi. Biroq hammasidan ham muhimi ilk qadamni qo`yish va boshqalarga qo`shilib yugurish deb o`ylayman.

Sharhlar