Surxondaryoda “Soxta jurnalist” aniqlandi. Bu haqda "Yangi davr" dasturida xabar berildi.
Ma`lum qilinishicha, "jurnalist" o`zini Respublikadagi etakchi telekanallar muxbiri sifatida tanishtirib shantaj yo`li bilan pul olib yurgan.
Jumladan, Davlat xavfsizlik xizmati, Iqtisodiy jinoyatlarga qarshi kurashish departamentining hududiy boshqarmalari tomonidan tezkor tadbirda Denov tumanidagi «Nihol studio» jurnalisti bo`lgan ayol "Agar pul bersangiz, sizni maqtayman. Bermasangiz, tanqid qilaman" deb, tadbirkorlarni qo`rqitib yurgani aniqlangan. U maqtovga oid lavhaning har bir daqiqasini 200 ming so`m etib belgilagan.
"Ko`rsatuvning efir haqi uchun pul so`raganman. Lavha ijtimoiy tarmoqlar orqali e`lon qilingan. Ish boshlaganimga 2-3 oy bo`lib qoldi. Ma`lumotim oliy", — deydi "jurnalist".
Shuningdek, u tadbirkorlik sub`ektlari, fermer xo`jaliklari, maktabgacha ta`lim tashkilotlari va ko`plab idoralar faoliyatini tasvirga olib, tanqidiy lavhalar tayyorlagan. Ijtimoiy tarmoqlar va televidenie orqali ko`rsatish bilan po`pisa qilib, agar kelishilgan pul berilsa, tasvirlarni o`chirib tashlash bilan tovlamachilik qilib yurgani aytilgan.
