Artel dunyoning birinchi raqamli xalqaro savdo ko‘rgazmasida ishtirok etdi

Artel kompaniyasi Germaniyaning Berlin shahrida bo`lib o`tgan "IFA Berlin — 2022” elektronika va maishiy texnika mahsulotlari xalqaro ko`rgazmasida ishtirok etdi.  

Joriy yilning 2-6 sentyabr kunlari bo`lib o`tgan mazkur ko`rgazmada dunyoning etakchi kompaniyalari ishtirokchilarga elektrotexnika va elektronika sohasidagi so`nggi ishlanma va yangiliklarni taqdim etdi. O`zbekiston Respublikasi Investisiyalar va tashqi savdo vazirligi huzuridagi Eksportni rag`batlantirish agentligi hamda “O`zeltexsanoat” uyushmasi tashabbusi bilan mazkur ko`rgazmada o`zbekistonlik mahalliy ishlab chiqaruvchi korxonalar ham qantashdi.

30 dan ortiq pavilionlarda dunyoning mashhur brendlari bilan bir qatorda “O`zbekistonda ishlab chiqarilgan” yorlig`i ostidagi mahsulotlar ham o`rin olgan. Ko`rgazmada yangi va innovasion ishlanmalar hamda mahsulotlar namoyish qilinib, ishtirokchilarda Artel savdo belgisi ostida ishlab chiqarilgan maishiy texnika vositalari ham katta qiziqish uyg`otdi.

IFA savdo ko`rgazmasining o`ziga xosligi shundaki, bunda ishbilarmon guruhlar hamkorlarni topishda qulaylik yaratish maqsadida bir qator bo`linmalar tashkil etilgan. Jumladan, IFA NEXT global innovasion markazda qatnashchilar soha mutaxassislaridan ilg`or biznes g`oyalar, ular to`g`risidagi tadqiqotlar, bilim hamda ma`lumotlarga ega bo`libgina qolmay, startaplar va yirik chakana savdo markazlari vakillari bilan uchrashish imkoniga ham ega bo`lishdi.

Ma`lumot uchun, IFA maishiy elektronika bo`yicha dunyodagi 1-raqamli ko`rgazma bo`lib, qariyb yuz yildan buyon har yili o`tkazib kelinadi. U ilk bor 1924 yil 4 dekabrda Berlin shahrida bo`lib o`tgan. O`shandayoq ko`rgazma muvaffaqiyatli start olgan edi. Shundan so`ng, har yili an`anaviy o`tkazishga qaror qilingan. Ko`p o`tmay ko`rgazma katta nufuzga ega bo`ldi va 1930 yilda IFAni Albert Eynshteyn tabrik nutqi bilan ochib bergan.

Artel kompaniyasining ana shunday nufuzli ko`rgazmalarda ishtirok etishi yangi hamkorlar bilan uchrashuv va muhim iqtisodiy shartnomalarni imzolash imkonini beradi. Qolaversa, uning jahon maishiy texnika bozorida o`ziga xos o`ringa egaligi hamda ishlab chiqarayotgan mahsulotlari xalqaro standartlar talabiga to`la javob berishini yana bir bor isbotlaydi.