Qirg`iziston Ta`lim va fan vaziri Almazbek Beyshenaliev hibsga olindi. Bu haqda "Sputnik Qirg`iziston" mamlakat Ichki ishlar vazirligiga tayanib xabar qildi.
Ma`lum qilinishicha, vazir katta miqdorda pora olishda gumon qilinmoqda.
"Ta`lim va fan vaziri pora olayotgan vaqtda qo`lga olindi. Xorijlik talabalarni mamlakatimiz oliy o`quv yurtlariga o`qishga qabul qilish chog`ida katta miqdorda (110 ming dollar) pora olayotganlik fakti tekshirilmoqda”, — deyiladi IIV rasmiy xabarida.
Jinoyat ishi bo`yicha tergov natijalariga ko`ra barcha to`liq ma`lumotlar taqdim etiladi, deb ta`kidladi IIV.
Ma`lumot uchun: Beyshenaliev 2020—2021 yillarda Ta`lim va fan vazirligi rahbari bo`lgan, biroq keyinchalik u lavozimidan ozod qilinib, Shveysariyadagi elchi, shuningdek, Qirg`izistonning BMTdagi doimiy vakili etib tayinlangan. Shu yilning fevral oyida Beyshenaliev yana vazir lavozimiga tayinlangan edi. U islohotlar o`tkazish, jumladan Qirg`izistonni 12 yillik ta`limga o`tkazish tashabbusi bilan tanilgan. Shuningdek, uning qo`l ostida maktab direktorlari tanlov asosida tanlana boshladi.
