AQSh Ukrainani parvozlardan holi hudud deb e`lon qilishdan voz kechdi. Jozef Baydenning so`zlariga ko`ra, Qo`shma Shtatlar uchinchi jahon urushini boshlamoqchi emas. Bu haqda "zamon.uz" xabar qildi.
Ma`lum qilinishicha, Oq uydagi matbuot anjumanida AQSh Prezidentidan Ukrainaga doimiy asosda yordam ko`rsatish masalasi so`ralgan.
"Ular uchun ko`p narsa qildik. Masalan, mendan Ukrainani parvozlardan holi hududga aylantirishda AQSh samolyotlaridan foydalanishni ko`p so`rashdi. Ammo biz buni amalga oshirmaymiz. Rossiya samolyotlarini urib tushirib, Uchinchi jahon urushini boshlamoqchi emasmiz", — degan Bayden.
Bundan tashqari, Prezident ukrain armiyasi Rossiya shaharlarini bombardimon qilishini istamasligini aytgan va shuning uchun 965 km uzoqlikka uchadigan raketalar bermaganini qayd etgan.
Hududiy yon berishlar haqida gapirar ekan, Bayden bu masalani Kievning o`zi hal qilishi kerakligini ta`kidlagan. U ushbu masalada Vashington Ukrainaga bosim o`tkazmasligini qo`shimcha qilgan.
