АҚШ Украинани парвозлардан ҳоли ҳудуд деб эълон қилишдан воз кечди. Жозеф Байденнинг сўзларига кўра, Қўшма Штатлар учинчи жаҳон урушини бошламоқчи эмас. Бу ҳақда "zamon.uz" хабар қилди.
Маълум қилинишича, Оқ уйдаги матбуот анжуманида АҚШ Президентидан Украинага доимий асосда ёрдам кўрсатиш масаласи сўралган.
"Улар учун кўп нарса қилдик. Масалан, мендан Украинани парвозлардан ҳоли ҳудудга айлантиришда АҚШ самолётларидан фойдаланишни кўп сўрашди. Аммо биз буни амалга оширмаймиз. Россия самолётларини уриб тушириб, Учинчи жаҳон урушини бошламоқчи эмасмиз", — деган Байден.
Бундан ташқари, Президент украин армияси Россия шаҳарларини бомбардимон қилишини истамаслигини айтган ва шунинг учун 965 км узоқликка учадиган ракеталар бермаганини қайд этган.
Ҳудудий ён беришлар ҳақида гапирар экан, Байден бу масалани Киевнинг ўзи ҳал қилиши кераклигини таъкидлаган. У ушбу масалада Вашингтон Украинага босим ўтказмаслигини қўшимча қилган.
