YuNESKO Hukumatlararo qo`mitasining 2023 yil 6 dekabrda bo`lib o`tgan XVIII sessiyasida O`zbekiston muhim muvaffaqiyatni qo`lga kiritdi: bir vaqtning o`zida uchta nominasiya Insoniyat nomoddiy madaniy merosi reprezentativ ro`yxatiga kiritildi.
“O`zbekistonda kulolchilik san`ati” nomzodlik to`plami baholash komissiyasining eng yuksak olqishiga sazovor bo`ldi. Bu hunarmandchilikning chuqur tarixi, kulolchilik sohasidagi bilimlarni bezavol etkazish hamda ushbu san`at turini asrab-avaylashda yoshlarning faol ishtirokiga urg`u beradi.
Eron, Ozarbayjon, Tojikiston va Turkiya hamkorligida “Bezak san`ati: naqqoshlik”, “Iftor va uning ijtimoiy-madaniy an`analari” nominasiyalari taqdim etildi.
Yangi nominasiyalar sharofati bilan O`zbekiston bashariyat tamadduni uchun ahamiyati e`tirof etilgan 15 ta nomoddiy meros YuNESKO muhofazasida ekanidan faxrlanadi. Bu boy madaniy merosni xalqaro darajada targ`ib etish va himoya qilishda muhim qadamdir, deyiladi Madaniyat va san`atni rivojlantirish agentligi xabarida.
