Ma’naviyat va ma’rifat markazi, AOKA, Madaniyat vazirligi, Kinematografiya agentligi, MTRK, O‘zbekiston Milliy media birlashmasining qarori bilan tele va radiokanallar hamda ijtimoiy tarmoqlar uchun tayyorlanayotgan mediamahsulotlar, xususan, serial, multfilm, kino va qo‘shiqlarni “ma’naviyat ekspertizasi”dan o‘tkazish tartibi joriy etildi. Bu haqda Ma’naviyat va ma’rifat markazi rahbari Otabek Hasanov ma’lum qildi.
Ta’kidlanishicha, "ma’naviyat ekspertizasidan o‘tkazish tartibi to‘grisida"gi nizom tasdiqlandi va unga muvofiq, ma’naviyat ekspertiza guruhining asosiy vazifalari belgilandi.
Jumladan, soha mutaxassislaridan tarkib topgan guruh tomonidan O‘zbekiston Respublikasi hamda xorijda ishlab chiqilgan va O‘zbekiston hududida namoyish etilayotgan media mahsulotlarning davlat siyosati, davlat ramzlari, milliy va umuminsoniy qadriyatlar, ma’naviy-axloqiy mezonlarga zid, insoniy fazilatlarga tahdid soluvchi axloqsizlik, behayolikni targ‘ib etuvchi holatlar mavjud-mavjud emasligi o‘rganiladi.
Media mahsulotlarning yoshlar tarbiyasi va milliy mentalitetimizga ta’siri baholanadi.
Yoshlar tarbiyasi va milliy mentalitetimizga rahna soluvchi media mahsulotlarning tarqatilishini oldini olish choralari ko‘riladi.
Bunday media mahsulotlarning namoyish etilishini to‘xtatish bo‘yicha tegishli vazirlik, idora va tashkilotlarga takliflar kiritib boriladi.
