Londonda Big-Ben nomi bilan mashhur Vestminster saroyidagi Yelizaveta minorasiga chiqqan erkakni hibsga olindi. U qo‘lida Falastin bayrog‘ini tutib olgan. Big-Benning pastida bir guruh odamlar yig‘ilib, “Falastinga ozodlik!” deb hayqirishgan.
Favqulodda xizmat xodimlari megafon orqali erkak bilan muzokara olib borib, uni tushishga ko‘ndirishga harakat qilishdi. Biroq u faqat o‘z shartlari asosida tushishini aytib, qutqaruvchilar yaqinlashsa, yanada yuqoriga chiqishini aytib tahdid qilgan.
Muzokaralar kun davomida bo‘lgan va yakshanba tongida yakunlangan. Erkakni yong‘in krani yordamida minora ustidan tushirishdi. U Big-Ben ustida jami 16 soat o‘tkazdi. Erkak pastga tushishi bilan darhol hibsga olingan.
