O‘zbekiston milliy terma jamoasida sobiq bosh murabbiy, oktabr oyidan beri yordamchi murabbiy sifatida faoliyat yuritayotgan Temur Kapadze terma jamoadan ketdi. Bu haqda O‘zbekiston futbol assotsiatsiyasi (O‘FA) matbuot xizmati xabar berdi.
44 yoshli mutaxassis o‘z faoliyatini yangi bosqichda davom ettirish niyatida, O‘FA rahbariyatiga lavozimidan ozod etilish to‘g‘risida murojaat qilgan. Unga boshqa takliflar tushgani va murabbiylik faoliyatini bosh murabbiy sifatida davom ettirish niyatida ekanligi sababli, rahbariyat uning qarorini hurmat bilan qabul qilgan.
“O‘zbekiston futbol assotsiatsiyasi Temur Kapadzening o‘zbek futboli rivojiga qo‘shgan hissasi uchun samimiy minnatdorlik bildiradi va uning murabbiylik faoliyatida katta muvaffaqiyatlar tilaydi”, deyiladi O‘FA bayonotida.
