O`zbekiston Respublikasi Prezidenti Shavkat Mirziyoev Afg`oniston Islom Respublikasi Prezidenti Muhammad Ashraf G`aniga maktub yo`lladi.
Mazkur maktubda Afg`oniston rahbariyati va butun afg`on xalqiga 2017 yilning 7 fevral kuni Qobul shahrida sodir etilgan terrorchilik harakati oqibatida ko`plab begunoh insonlarning qurbon bo`lgani va jarohat olgani munosabati bilan chuqur ta`ziya bildirdi.
Davlatimiz rahbari qurbon bo`lganlarning oila a`zolari va yaqinlariga hamdardlik so`zlarini izhor etdi.
Eslatib o`tamiz, kuni kecha Afg`oniston poytaxti Qobuldagi Oliy sud binosi oldida sodir bo`lgan teraktda 21 kishi halok bo`lib, 48 kishi jabrlangandi.
