Bosh prokuratura Saidovning “Facebook”da e`lon qilgan xabari yuzasidan bayonot berdi

“Facebook” ijtimoiy tarmog`i foydalanuvchisi Dilmurod Saidov sahifasi orqali o`zi bilan bog`liq sud qarorlaridan norozi bo`lib bir nechta “post” e`lon qilgan.

Bosh prokuratura Matbuot xizmatining ma`lum qilishicha, Fuqaro D.Saidovning sud qarorlaridan norozi bo`lib, “Facebook” ijtimoiy tarmog`ida e`lon qilingan xabarlari, shuningdek Bosh prokuraturaga yo`llagan murojaati jinoyat ishi hujjatlari bilan birga o`rganib chiqildi.

Unga ko`ra, Jinoyat ishlari bo`yicha Tayloq tuman sudining 30.07.2009 yildagi hukmiga ko`ra, D.Saidov JKning 165-moddasi 3-qismi “a” bandi, 228-moddasi 2-qismi “b” bandi va 228-moddasi 3-qismi bilan aybdor deb topilib, unga 12 yil 6 oy muddatga ozodlikdan mahrum qilish jazosi tayinlangan.

Jinoyat ishlari bo`yicha Samarqand viloyat sudi apellyasiya instansiyasining 11.09.2009 yildagi ajrimi bilan hukm o`zgarishsiz qoldirilgan.

Oliy sud jinoyat ishlari bo`yicha sudlov hay`atining 06.09.2019 yildagi ajrimi bilan sud qarorlari o`zgartirilib D.Saidovga tayinlangan ozodlikdan mahrum qilish jazosi 11 yil muddatga qisqartirilgan.

D.Saidov murojaatida,tergov va sud bir yoqlama olib borilganligi,asossiz ayblanganligi hamda hujjatlarni qalbakilashtirmaganligini bildirgan.

Bosh prokuratura tomonidan jinoyat ishi o`rganib chiqildi. Sud tomonidan D.Saidovning harakatlari to`g`ri kvalifikasiya qilinib, unga nisbatan qonun doirasida jazo tayinlangan.

Jinoyat ishini o`rganish natijasiga ko`ra, sud qarorlariga nisbatan protest keltirish uchun asoslar topilmadi.